މ. އަސަރީ ހަނދާން، އުމުރުން 43 އަހަރުގެ ތަސްލީމް މުހައްމަދު ދަތުރުގޮސް އުލެނިކޮށް ގެއްލުނީ މިދިޔަ ހުކުރު ދުވަހުއެެވެ. އޭނާއާ އެކު ދަތުރު ދިޔަ މީހުންނާއި ހަވާލާދީ ފުުލުހުން ބުނީ އެންމެ ފަހުން ތަސްލީމް ފެނިފައި ވަނީ ހުކުރު ދުވަހުގެ ހެނދުނު 10-11 އާ ދެމެދު ކަމަށެވެ.
ފުލުހުން ބުނީ ތަސްލީމު ގެއްލުމުގައި ސުވާލު އުފެދޭ ގިނަ ކަންކަން ހުރުމުން އެ މައްސަލަ ސީރިއަސް މައްސަލައެއްގެ ގޮތުގައި ޖިނާއީ ތަހުގީގެއް ހިންގަން ފަށާފައިވާކަމަށެވެ. އަދި އޭނާ ހޯދުމުގެ މަސައްކަތް ކުރަމުން އަންނައިރު އޭނާއާ އެކު ދަތުރު ދިޔަ މީހުންނާއި ސުވާލުކޮށްފައިވާކަމަށްވެސް ފުލުހުން ބުނެއެވެ.
ތަސްލީމު ދަތުރުދިޔަ ތަނަކީ މާލެއާއި 14 ވަރަކަށް މޭލު ދުރުގައި އޮންނަ ފަސްގަނޑެކެވެ. އެތަނަމީ ހިއްކާފައި އޮތްތަނެއްކަމުން އެތަނުގައި ގަހެއް ރުކެއްވެސް އަދި ނެތެވެ.
ތަސްލީމު ހޯދުމުގެ މަސައްކަތުގެ ތެރެއިން ފިނޮޅުގެ ވަށައިގެން 5،000 އަކަފޫޓުގެ ސަރަހައްދެއް ސްނޯކަލްކޮށްގެން ބަލާފައިވާކަމަށް އެމްއެންޑީއެފުން ބުނެއެވެ. އަދި ކޯސްޓް ގާޑުގެ ޑައިވަރުން 3،000 އަކަފޫޓުގެ ސަރަހައްދެއް ޑައިވްކޮށްގެން ބަލާފައިވާކަމަށްވެސް އެމްއެންޑީއެފުން ބުނެއެވެ.
ތަސްލީމު ގެއްލިފައިވަނީ މޫދަށްކަން ކަށަވަރުނުވާތީ މެރިޓައިމް ސާޗް އެންޑް ރެސްކިއު ކޭސްއެއްގެ ގޮތުގައި އެ ހާދިސާ ކަނޑައަޅާފައި ނުވާތީ ޑްރޯންވެސް ބޭނުން ނުކުރާކަމަށް އެމްއެންޑީއެފުން ވަނީ ބުނެފައެވެ.
