މިއަދު ސޯޝަލް މީިޑިއާގައި އާންމުވެފައިވާ ޕޯސްޓެއްގައި މަންމައަކު ބަޔާންކޮށްފައިވާ އަސަރުން ފުރިގެންވާ ބަސްތައް މިކަމުގެ އަލިގަދަ ހެއްކަކަށް ފުދެއެވެ.
ސޯޝަލް މީޑިއާ ޕްލެޓްފޯމް، ފޭސްބުކް މެދުވެރިކޮށް މަންމައަކު ބަންޑުންކޮށްލި މި އަސަރުގަދަ ޖަޒުބާތީ ސުއޫރުތަކަކީ، ސްކޫލެއްގައި ތައުލީމު ހާސިލް ކުރަމުން ދިޔަ އޭނާގެ ހާއްސަ އެހީއަށް ބޭނުންވާ ދަރިފުޅުގެ ގައިގައި ކުދިންތަކެއް ވެގެން، ތަޅާ އަނިޔާކުރުމާއި ގުޅިގެން ފާޅުކުރި ޝުއޫރުތަކެކެވެ.
ހާދިސާ ދިމާވި ކުއްޖާގެ ބޮލުގައި ހަރުކޮށްފައި އިން ޑިވައިސްއަކީ އޮޕަރޭޝަނަކަށް ފަހު އެކުއްޖާގެ ބޮލުގައި ޖަހާފައިވާ ޑިވައިސެކެވެ. އެކަން ފާހަގަކޮށް، ކުއްޖާގެ މަންމަ އަސަރާއެކު ލިޔެފައި ވަނީ، އެ ޑިވައިސްއަކީ ދަރިފުޅުގެ އަޑުއިވުމުގެ ހިއްސު ކަމަށެވެ. އެހެންކަމުން، އެއީ ކޮން އެއްޗެއް ކަން ސްކޫލުގެ ހުރިހާ ދަރިވަރުންނަށް ވެސް އިނގުން މުހިންމު ކަމަށް އޭނާ ލިޔެފައި ވެއެވެ.
އެ މަންމަގެ ޖަޒުބާތީ މެސެޖުން އެތައްބައެއްގެ ހިތް ރޮއްވާ، ކުދިކުދިކޮށްލި އިރު، އެ މަންމަގެ ވާހަތަކަށް އާންމުންގެ ފަރާތުން ލިބިފައި ވަނީ އާދަޔާއި ހިލާފު ބޮޑު ތަރުހީބެކެވެ. އޮހެމުން ދިޔައީ ތައުރީފުގެ ބަސްތަކެވެ. މި މައްސަލަ ފެންމަތިވުމުން ގިނަ ބަޔަކު އަންނަނީ ސޯޝަލް މީޑިއާގައި ކަންބޮޑުވުން ފާޅު ކުރަމުންނެވެ.
މިވަގުތުވެސް އެ މަންމަގެ ޖަޒުބާތީ ވާހަތަކަށް އެތަކެއް ހާސްބައެއްގެ ހަމްދަރުދީގެ މެސެޖުތައް ލިބެމުން އަންނައިރު، އެ މަންމަގެ މި ވާހަކަތަކަށް ކޮމެންޓް ކުރި މީހަކު ބުނެފައިވަނީ ދަރިއަކަށް އެފަދައިން ސްކޫލް މާހައުލުގައި ހަނގާކޮށް، އަނިޔާ ދިނުމަކީ ކޮންމެ މަޔަކާއި ބަފައެއްގެ ހިތައް ކެތް ނުކުރެވޭނޭ ކަމެއް ކަމަށާއި، އެފަދަ ކަންކަން ސްކޫލުތެރޭގައި ހިނގަނީ ޓީޗަރުންވެސް އަދި ކަމާބެހޭ ފަރާތްތަކުންވެސް އަޅާނުލާތީކަމަށެވެ.
އެ ޕޯސްޓާއި ގުޅުވައި އިތުރު މީހަކު ފޭސްބުކް ގައި ކުރި ޕޯސްޓެއްގައި ބުނެފައިވަނީ ދަރިން ސްކޫލްގައި ހޭދަ ކުރާ ދުވަސް ތަކުގައި މިފަދަ އެތަކެއް ހިތްދަތި ކަންކަން ދިމާވާކަމަށާއި އެގޮތުން އެފަދަކަމެއް ކުރިން ތަޖުރިބާ ވެސް ކޮށްފައިވާކަމަށެވެ.
އެ ތަޖުރިބާވެސް ހިއްސާކުރަމުން އެ މީހާ ބުނެފައިވަނީ އޭނާގެ ދަރިފުޅަކާ ދިމާލަށް ސްޕަވައިޒަރަކު ބެލެނިވެރިން ތަކުގެ ކުރިމަތި ވަރަށް ހުތުރުކޮށް އެއްޗެހި ކިޔަނިކޮށް އެމަންޒަރު ފެނުނުކަމަށެވެ. އަދި އެވަގުތު އެފަދަ ހިތްދަތި އިހުސާތަކެއް ކުރެވިފައިވާކަމަށް ވެސް އޭނާ ވަނީ ބުނެފަ އެވެ.
ބުލީ ނުވަތަ ގަނާ ކުރުމަކީ ރާއްޖޭގައި އާންމުވެފައިވާ ވަރަށް ނުބައި އާދައެކެވެ. ބުލީ ކުރުމޭ ބުނީމާ މިއީ ވަރަށް ގިނަ ކަންތައްތަކެކެވެ. އެއީ މީހަކު ހުންނަ ސިފައަކަށް މަލާމާތް ކުރުމާއި ވާހަކަ ދައްކާ ގޮތް ތަފާތުވުމުން އެކަމާމެދު ފުރައްސާރަ ކުރުމެވެ. ނުވަތަ ކުރެވޭ ކަމެއްގެ ސަބަބުން މީހުންގެ ހިތުގައި ޖެހޭ ގޮތަށް އެއްޗެހި ކިޔާ ދިމާކޮށް ހެދުމެވެ.
މިފަހަކަށް އައިސް ސުކޫލް މާހައުލުގައި ކުދިންނަށް ބުލީ ނުވަތަ ގަނާ ކުރުމުގެ ބައެއް މައްސަލަތަށް ތަކުރާރުވެ އެވެ. އަދި އެފަދަ ކަންކަން ދިމާވުމުގައި ބައެއް ޓިޗަރުންގެ އިހުމާލު ހުރިކަން ވެސް ބައެއް ފަހަރު ފެންމަތި ވެއެވެ. ބައެއް ބެލެނިވެރިން ގަބޫލުކުރާ ގޮތުގައި ސްކޫލު ބުލީ މިހާރު ގޮސްފައިވާ ހިސާބަކީ ސްކޫލާ ނުވަތަ ބުލީ ކުރާ ކުއްޖާގެ ބެލެނިވެރިންނާ ވާހަކަ ދައްކައިގެން ހައްލު ކުރެވޭ ވަރަށް ވުރެ މަތީގަ އެވެ.
ކުދިން ބުލީގެ ޝިކާރައަކަށް ވާން ފަށަނީ އެކި މާހައުލުންނެވެ. ބައެއް ކުދިންނަށް ގޭތެރެއިންނެވެ. އަނެއްބައިކުދިންނަށް ސްކޫލުންނެވެ. ނުވަތަ މަގުމަތިންނެވެ. ތެދެކެވެ. ގަބޫލްކުރަން ބޭނުން ނުވިޔަަސް ކުދިން ބްލީކުރަން ދަސްކޮށް އާދަކުރަނީ ބޮޑެތިމީހުންގެ ފުށުން ނެވެ. މުޖުތަމައުން ނެވެ. ބެލެނިވެރިން މީހުންނަށް އާޑަފުރައްސާރަ ކުރުން ވަނީ އިތުރެވެ. އަނެއްކޮޅުން ކުދިންގެ ހައްގުތައް ގިނަކަމުން ނަސޭހަަތަކަށްވެސް އެއްޗެއް ބުނެފިމީހާ ވަނީ ކުށްވެރި އެވެ.
