މީރޭ އެފްބީގައި އާއްމުކުރި ވީޑިއޯއެއްގައި އަދީބު ވިދާޅުވީ ޑރ. މުއިއްޒާއި މެދު ޔާމީން ހިތްހަމަނުޖެހެން ފެއްޓެވީ އެމަނިކުފާނާއި ގާތްގުޅުމެއް އޮންނަ ގޭންގެއް ބޭނުންކުރަމުން ދިޔަ ޕާކެއް ރައީސް ޑރ. ވަހީދުގެ ވެރިކަމުގައި ބަންދުކޮށްގެންކަމަށެވެ.
އަދީބު ވިދާޅުވީ ސްކޫލް ދަރިވަރެއް މަރާލައިގެން މާލޭގައި ހުރި ޕާކެއް ބަންދުކުރި ފަހުން ޑރ. މުއިއްޒާއި މެދު ޒާތީ ގޮތެއް ޔާމީން ގެންގުޅުއްވަމުން ގެންދެވިކަމަށެވެ. އަދި ރައީސް ޔާމީންގެ ވެރިކަމުގައި މުއިއްޒަށް ހައުސިން މިނިސްޓަރުކަން ދެއްވީވެސް އެމަނިކުފާނުގެ ނަން އެމްޑީއޭއިން ހުށައެޅުމުންކަމަށްވެސް އަދީބު ވިދާޅުވިއެވެ.
އަދީބު އެ ވިދާޅުވީ 2012 ވަނަ އަހަރު ލޮރެންޒޯ ޕާކުގައި މަރާލާފައި އޮއްވާ ފެނުނު ދަރުމަވަންތަ ސްކޫލްގެ ދަރިވަރު، މުހައްމަދު އަރުހަމްގެ ވާހަކައެވެ. އެ ހަދިސާއަށްް ފަހު އޭރުގެ ސަރުކާރުން ވަނީ އެޕާކު ބަންދުކޮށްފައެވެ.
