އިންސްޓަގްރާމްގައި ޝާއިއުކުރި ވީޑިއޯއެއްގައި މަލައިކާ ވަނީ އޭނާގެ 2024 ވަނަ އަހަރުގެ ރާއްޖޭގައި ހޭދަކުރި ޗުއްޓީގެ ހައިލައިޓްތައް ދައްކުވައިދީފައެވެ. "ޕެރަޑައިސް...." މިހެން ލިޔެފައިވާ އިރު، އިރާއި ކަނޑާއި ރަށުގެ އިމޯޖީތަކެއްވެސް ވަނީ ބޭނުންކޮށްފައެވެ.
މި ވީޑިއޯގައި މަލައިކާ އަރޯރާ ވަނީ ރާއްޖޭގެ ގޮނޑުދޮށުގައި އަވީގައި އުޅޭ މަންޒަރުތަކާއި، ރިސޯޓަށް އެރުމުން ދިވެހި ސަގާފީ ނެށުންތަކުން މަރުޙަބާ ކިޔާ މަންޒަރުތައް ދައްކުވައިދީފައެވެ. މީގެ އިތުރުން، އޭނާގެ ކޮޓަރީގައި ހުރި އިންފިނިޓީ ޕޫލްގައި ޖޫސް ބޯލަބޯލާ އިންނަ މަންޒަރާއި، ކަޅު އަދި ރަން ކުލައިގެ ބިކިނީއެއް ލައިގެން މޫދަށް އެރުމަށް ތައްޔާރުވާ މަންޒަރުވެސް ހިމަނާފައިވެއެވެ.
ނަމަވެސް، މަލައިކާ އަރޯރާގެ މި ޗުއްޓީއާ ގުޅިގެން ބައެއް ފަރާތްތަކުން ވަނީ ފާޑުކިޔުންތަކެއް އަމާޒުކޮށްފައެވެ. މިގޮތުން، އިންޑިއާއާއި ރާއްޖެއާ ދެމެދު ފަހަކަށްއައިސް އުފެދިފައިވާ ސިޔާސީ ގުޅުމުގެ ކަންބޮޑުވުންތަކާ ގުޅުވައިގެން ބައެއް މީހުން ވަނީ މަލައިކާގެ މި ދަތުރަށް ސުވާލު އުފައްދާފައެވެ.
މަލައިކާ އަރޯރާ ރާއްޖޭގައި ހޭދަކުރި މި ޗުއްޓީއަކީ އޭނާއަށް އުފާވެރި ތަޖުރިބާއަކަށްވީ ނަމަވެސް، އިޖްތިމާއީ ގޮތުން އޭގެ ސަބަބުން އުފެދުނު ބަޙުސްތަކުގެ ސަބަބުން މިއީ ވަރަށް ގިނަ ފަރާތްތަކުގެ ސަމާލުކަން ލިބުނު ހާދިސާއެކެވެ.
