ކިމިޗަށް ރަސްމީކޮށް ކެޕްޓަންކަން މި ދިނީ އެންމެ ފަހުގެ ޔޫރޯ ފުޓްބޯޅަ މުބާރާތަށްފަހު ގިނަ ސީނިއާ ކުޅުންތެރިން ރިޓަޔާކުރުމާ ގުޅިގެންނެވެ. ޔޫރޯގައި ޖަރުމަނުގެ ކެޕްޓަންކަން ކުރި، އިލްކާއީ ގުންޑޮގާންގެ އިތުރުން ކުރީގެ ކެޕްޓަން އަދި ގޯލްކީޕަރު، މެނުއެލް ނޯޔާ އާއި ތޯމަސް މުލާ ވަނީ ކުޅުން ހުއްޓާލައިފައެވެ. މީގެ އިތުރުން ޓޯނީ ކްރޫޒްވަނީ ބޯޅަ ކުޅުންވެސް ހުއްޓާލާފައެވެ.
އުމުރުން 29 އަހަރުގެ ކިމިޗް ޖަރުމަނުގެ ކެޕްޓަންކަމަށް އައްޔަންކޮށްފައިވާކަން ހާމަކުރީ ހޯމަ ދުވަހުއެވެ. 2016 ވަނަ އަހަރުން ފެށިގެން ޖަރުމަނަށް ކުޅެމުންއަންނަ ކިމިޗް ރަސްމީކޮށް ކެޕްޓަންކަމުގައި އެ ޓީމުން ނިކުންނަ ފުރަތަމަ މެޗަކީ ޔުއެފާ ނޭޝަންސް ލީގުގައި އަންނަ ހޮނިހިރު ދުވަހު ހަންގޭރީއާ ދެކޮޅަށް ކުޅޭ މެޗެވެ. މިހާތަނަށް ޖަރުމަނު ޓީމަށް 91 މެޗު ކުޅެދީފައިވާ ކިމިޗް ވަނީ ޖުމްލަ 17 ފަހަރު މަތީން އެ ޓީމުގެ ކެޕްޓަންކަން ކޮށްފައެވެ.
