ހަބަރާއި މައުލޫމާތު ފެތުރުމުގެ ދާއިރާ މޫސާ ލަތީފު މަސައްކަތް ކުރައްވަމުން ގެންދަވާތާ 35 އަހަރަށް ވުރެ ގިނަ ދުވަސް ވަނީ ވެފައެވެ. މޫސާ ނޫސްވެރިކަމުގެ ދާއިރާއަށް ވެދެވަޑައިގަތީ 1987ވަނަ އަހަރުގެ ތެރޭގައެވެ.
ހަބަރާއި މައުލޫމާތު ފެތުރުމުގެ ދާއިރާއިން 2001ވަނަ އަހަރު ހިތްވަރު ދިނުމުގެ ޤައުމީ އިނާމުވެސް މޫސާ ލަތީފަށް ވަނީ ލިބިވަޑައިގެންފައެވެ.
މޫސާ ލަތީފުގެ ލިޔުންތައް ފުރަތަމަ ފެންނަން ފެށީ ދުވަހު ނޫސް "ހަވީރު"ގެ ސަފުހާތަކުންނެވެ. އޭގެ ފަހުން "ހަވީރު" ނޫހާ ގުޅިވަޑައިގެން މޫސާ ލަތީފުގެ ހުރިހާ ވަގުތެއް ހޭދަކުރައްވަމުން ގެންދެވީ ނޫސްވެރިކަމުގައެވެ. "ހަވީރު" ނޫހުގެ ކުޅިވަރު ރިޕޯޓަރެއްގެ ވަޒީފާއިން ފެށިގެން ސީނިއަރ ރިޕޯޓަރު ކަމާއި، ސަބް އެޑިޓަރ ކަމާއި، އެސިސްޓެންޓް އެޑިޓަރު ކަމާއި، ސީނިއަރ އެސިސްޓެންޓް އެޑިޓަރު ކަމާއި، އެކްޓިންގ އެޑިޓަރުކަން ކުރެއްވިއެވެ. އަދި 2010ވަނަ އަހަރުގެ މޭ މަހުން ފެށިގެން 1 އެޕްރީލް 2016 ގައި "ހަވީރު" ނޫސް ވަގުތީގޮތުން ހުއްޓާލަންދެން އެޑިޓަރުކަން ކުރައްވަމުން ގެންދެވީ މޫސާ ލަތީފެވެ.
ޒަމާންވީ ނޫސްވެރިކަމުގައި ހިމެނޭ މައިގަނޑު ހުރިހާ ވައްޓަފާޅިއެއްގެ ލިޔުންތައް މޫސާ ލަޠީފް ލިޔުއްވިއެވެ. އޭގެތެރޭގައި، ޚަބަރު، ފީޗަރ ނިއުސް، ބްރޭކިންގ ނިއުސް، ރިޕޯޓު، ފީޗަރ ރިޕޯޓު، ތަޙުޤީޤީ ރިޕޯޓު، ޕްރޮފައިލް އަދި ކޮލަމް ހިމެނެއެވެ. މި ހުރިހާ ވައްޓަފާޅިއެއްގެ ލިޔުން، ރާއްޖޭގެ ނޫސްވެރިކަމަށް އެންމެ ފުރަތަމަ ތަޢާރުފު ކުރެއްވި ނޫސްވެރިންގެ ތެރޭގައި، މޫސާ ލަޠީފް ހިމެނިވަޑައިގަންނަވައެވެ. އޭގެކުރިން، ރާއްޖޭގައި ލިޔަމުން ގެންދިޔައީ، ޚަބަރާއި، މަޒުމޫނާއި، ޕްރޮފައިލް އަދި ކޮލަމް ފަދަ މަދު ލިޔުންތަކެވެ.
"ހަވީރު" ނޫހުގެ މުހިންމު ބްރޭންޑެއް ކަމަށްވާ "ހަވީރު ސްޕޯޓްސް އެވޯޑް" 1994ވަނަ އަހަރު ތަޢާރުފު ކުރުމުގައި، އިސް ދައުރެއް އަދާކުރެއްވުމުގެ އިތުރުން، 2010ވަނަ އަހަރުން ފެށިގެން 2016ވަނަ އަހަރާ ހަމައަށް، އެ އެވޯޑް އިންތިޒާމު ކުރެއްވުމުގައި، އެންމެ އިސް ބޭފުޅަކަށް ހުންނެވީ މޫސާ ލަޠީފެވެ.
ނޫސްވެރިކަމުގައި މޫސާ ލަޠީފުގެ އެންމެބޮޑު އެއް މަސައްކަތަކަށް ވެގެންދިޔައީ، 7 ފެބުރުވަރީ 2012ގެ ހާދިސާ ގުޅޭގޮތުން ލިޔުއްވި ފެބުރުވަރީ 7ގެ ފޮތެވެ. މިއީ ގިނަ ބައެއްގެ އިންޓާވިޔުތަކެއްގެ މައްޗަށް ބިނާކުރެއްވި އަދި އެ ހާދިސާގެ އިތުރުން، ރާއްޖެ މިހާރު ދެކެމުން އަންނަ ޑިމޮކްރެސީއަށް ފުރޮޅިގެންދިޔަ ތާރީޚުގެ މައްޗަށްވެސް ތަޙުޤީޤީ ބަޔާންތަކެއް ހިމެނުއްވި ފޮތެކެވެ.
ނޫސްވެރިކަމުގެ ދާއިރާއިން ރާއްޖެއިން ބޭރުން މަތީ ތަޢުލީމު ހާސިލުކުރައްވާފައިވާ މޫސާ ލަތީފް މިހާރު ހުންނެވީ، "ދައުރު" ނޫހުގެ އެޑިޓަރު ކަމުގެ މަގާމުގައެވެ.
