މި ބޭފުޅުންނަށް ޝަރަފުވެރިކަމުގެ އިނާމު ދެއްވީ މި އަހަރުގެ ގައުމީ ދުވަހުގެ މުނާސަބަތުގައި ބޭއްވި ރަސްމީ ޖަލްސާގައި ރައީސް ޑރ. މުހައްމަދު މުއިއްޒެވެ.
މި އަހަރު ޝަރަފުވެރިކަމުގެ ޤައުމީ އިނާމު ލިބިވަޑައިގެންނެވި ބޭފުޅުންނަކީ
- އަލްމަރްޙޫމް މުހައްމަދު ތައުފީޤު ( ދެމިހުންނަނިވި ހާއްޞަ ހިދުމަތެއް ކުރުމުގެ ދާއިރާއިން )
- ޑޮކްޓަރ އަބްދުލްއަޒީޒް ޔޫސުފް ( ސިއްހީ ދާއިރާއިން )
- މުހައްމަދު މާޖިދު ( ކުދި ފަންތިއާއި މެދު ފަންތީގެ ވިޔަފާރީގެ ދާއިރާއިން )
- މޫސާ ލަތީފް ( ހަބަރާއި މައުލޫމާތު ފެތުރުމުގެ ދާއިރާއިން )
- މުހައްމަދު ނާސިރު ( ކުޅިވަރުގެ ދާއިރާއިން )
- އަހްމަދު މުހައްމަދު ( ކުޅިވަރުގެ ދާއިރާއިން )
- ހަސަންމަނިކު ( ޕާފޯމިން އާޓްސްގެ ދާއިރާއިން )
ޝަރަފުވެރިކަމުގެ ޤައުމީ އިނާމު ލިބިވަޑައިގެންނެވި އަލްމަރްޙޫމް މުހައްމަދު ތައުފީޤު
އަލްމަރްޙޫމް މުހައްމަދު ތައުފީގު
ދެމިހުންނަނިވި ހާއްސަ ހިދުމަތެއް ކުރުމުގެ ދާއިރާއިން، އެ ބޭފުޅެއްގެ ހަނދާނަށް ޝަރަފުވެރިކަމުގެ ޤައުމީ އިނާމު އެރުވި ބޭފުޅަކީ، އެ ބޭފުޅެއްގެ އަޑުފުޅުން ޒަމާންތަކަށް ދެމިހުންނާނެ ފަދަ ގޮތަކަށް ރާއްޖޭގެ ރައްޔިތުންނަށް ވަރަށް އަގުހުރި ހަދިޔާއެއް ކޮށްދެއްވައިފައިވާ އަދި ދެމިހުންނަނިވި ހާއްސަ ހިދުމަތެއް ކުރައްވައިފައިވާ ބޭފުޅެކެވެ.
ކޮމްމެ ރޯދަމަހަކު ދިވެހި ރާއްޖޭގެ އަޑުން ގެނެސްދޭ ކީރިތި ރަސޫލާގެ ސިޔަރަތަކީ ކީރިތި ރަސޫލާގެ ސިޔަރަތުގެ އަޑުފުޅުން ރިކޯޑްކޮށްފައިވާ އެއްޗެކެވެ. ކީރިތި ރަސޫލާގެ ސިޔަރަތު ކީރިތި ރަސޫލާގެ ސިޔަރަތު ފުރަތަމަ ރެކޯޑު ކުރެއްވީ، 1974ވަނަ އަހަރުއެވެ. ދެވަނަ ރެކޯޑިންގ 1983ވަނަ އަހަރުއެވެ. އަދި، އޭގެ 11 އަހަރު ފަހުން، އެންމެފަހު ރެކޯޑިންގ 1994ވަނަ އަހަރުއެވެ. އެންމެފަހު ރެކޯޑިންގ ހެއްދެވީ، މަރްޙޫމް މުހައްމަދު ތައުފީޤު، މި ދުނިޔެ ދޫކުރެއްވުމުގެ އަހަރެއްހާ ދުވަސް ކުރިންނެވެ.
ޝަރަފުވެރިކަމުގެ ޤައުމީ އިނާމު ލިބިވަޑައިގެންނެވި ޑޮކްޓަރ ޢަބްދުލްއަޒީޒް ޔޫސުފް
ޑޮކްޓަރ ޢަބްދުލްއަޒީޒް ޔޫސުފް
ހައްދުންމަތީ ގަމަށް އުފަން ޑޮކްޓަރ އަބްދުލްއަޒީޒް ޔޫސުފަކީ، ރާއްޖޭގެ ސިއްހީ ދާއިރާއަށް ދިގު މުއްދަތެއްގައި ހިދުމަތް ކުރައްވައިފައިވާ އަދި، މިހާރުވެސް ޚިދުމަތުގައި ދެމިހުންނަނިވި ބޭފުޅެކެވެ. ޑރ އަބްދުލްއަޒީޒް ޔޫސުފް، އިންޑިއާގެ ޔުނިވާސިޓީ އޮފް މެޑްރާސްއިން 1982ވަނަ އަހަރުގެ ކުރީކޮޅު، އެމް.ބީ.ބީ.އެސް. ފުރިހަމަކުރައްވައި، އެއް އަހަރު ދުވަހުގެ އިންޓަރންޝިޕް ހެއްދެވުމަށްފަހު، އަދި ކްލިނިކަލް މެޑިސިންގެ ދާއިރާތަކުން ދެ އަހަރު ދުވަހުގެ ތަޖުރިބާ ހޯއްދެވުމަށްފަހު، އެނބުރި ރާއްޖެއަށް ވަޑައިގެން ސަރުކާރަށް ހިދުމަތް ކުރައްވަން ފެށްޓެވީ، 2 އެޕްރީލް 1985ގައެވެ.
ޝަރަފުވެރިކަމުގެ ޤައުމީ އިނާމު ލިބިވަޑައިގެންނެވި މުހައްމަދު މާޖިދު
މުހައްމަދު މާޖިދު
ކުދި ފަންތިއާއި މެދު ފަންތީގެ ވިޔަފާރީގެ ދާއިރާއިން މި އަހަރު ޝަރަފުވެރި ކަމުގެ ޤައުމީ އިނާމު ހާސިލުކުރައްވާ މުޙައްމަދު މާޖިދަކީ، އުމުރުން އެންމެ 15 އަހަރުގައި ވަޒީފާގެ މައިދާނަށް ނުކުމެވަޑައިގެންނެވި ބޭފުޅެކެވެ. ފުރަތަމަ ވަޒީފާ އަދާކުރެއްވީ، މެރިން ޑިޕާޓްމަންޓުގައެވެ. އެ ތަނުގެ ލޯންޗުފަހަރުގެ ކަވަރުތަކާއި ސީޓުތައް ހަލާކުވެފައި ހުރުމުގެ ސަބަބުން، އެ ސީޓުތައް މަރާމާތު ކުރުމުގެ މަސައްކަތް މާޖިދާ ހަވާލުކުރެއްވި ހިސާބަކީ، މި ދާއިރާއަށް ވެދެވަޑައިގެންނެވުނު ހިސާބެވެ.
ހަބަރާއި މައުލޫމާތު ފެތުރުމުގެ ދާއިރާއިން ޝަރަފުވެރިކަމުގެ ޤައުމީ އިނާމު ހާސިލުކުރެއްވި "ދައުރު" ނޫހުގެ އެޑިޓަރު މޫސާ މޫސާ ލަތީފް
މޫސާ ލަތީފް
ހަބަރާއި މައުލޫމާތު ފެތުރުމުގެ ދާއިރާ މޫސާ ލަތީފު މަސައްކަތް ކުރައްވަމުން ގެންދަވާތާ 35 އަހަރަށް ވުރެ ގިނަ ދުވަސް ވަނީ ވެފައެވެ. މޫސާ ނޫސްވެރިކަމުގެ ދާއިރާއަށް ވެދެވަޑައިގަތީ 1987ވަނަ އަހަރުގެ ތެރޭގައެވެ.
ހަބަރާއި މައުލޫމާތު ފެތުރުމުގެ ދާއިރާއިން 2001ވަނަ އަހަރު ހިތްވަރު ދިނުމުގެ ޤައުމީ އިނާމުވެސް މޫސާ ލަތީފަށް ވަނީ ލިބިވަޑައިގެންފައެވެ. މޫސާ ލަތީފުގެ ލިޔުންތައް ފުރަތަމަ ފެންނަން ފެށީ ދުވަހު ނޫސް "ހަވީރު"ގެ ސަފުހާތަކުންނެވެ.
ޝަރަފުވެރިކަމުގެ ޤައުމީ އިނާމު ލިބިވަޑައިގެންނެވި މުހައްމަދު ނާސިރު
މުހައްމަދު ނާސިރު
ކުޅިވަރަށް ޚިދުމަތް ކުރުމުގެ ރޮނގުން ޝަރަފުވެރި ކަމުގެ ޤައުމީ އިނާމު ލިބިވަޑައިގަންނަވާ މުޙައްމަދު ނާޞިރަކީ، ރާއްޖޭގައި ރަސްމީ ސިފައެއްގައި ކުޅެވުނު ވަރަށްގިނަ ކުޅިވަރުތަކެއްގައި، ކުޅުންތެރިއެއްގެ ގޮތުން ވަރަށް މަޝްހޫރުކަން ހޯއްދެވި ބޭފުޅެކެވެ. ފުޓުބޯޅައާއި ޓީ.ޓީ. އާއި، ކްރިކެޓާއި، ހޮކީއާއި، ބެޑްމިންޓަނާއި، އެތުލެޓިކްސް، ޓެނިސް، ބާސްކެޓް، ވޮލީ އަދި ބައިސްކަލް ރޭސްތަކުން، މުޙައްމަދު ނާޞިރު ވަނީ ގިނަ ކާމިޔާބީތަކެއް ހޯއްދަވައިފައެވެ. އަދި މަންޑި ފަދަ ސަގާފީ ކުޅިވަރުތަކުގައިވެސް ނާޞިރު ވަނީ ރަތް ވަނަތަކެއް ހޯއްދަވައިފައެވެ.
އަހްމަދު މުހައްމަދު
އަޙްމަދު މުހައްމަދަކީ، ކުޅިވަރަށް ލޯބިކުރައްވާ، ކުޅިވަރު ކުޅުއްވާހިތްޕުޅުވާ އަދި ގާތްގަނޑަކަށް ވޭތުވެދިޔަ، ބައި ޤަރުނެއްހާ ދުވަހު ކުޅިވަރުގައި ހޭދަކުރައްވައިފައިވާ އަދި މިހާރުވެސް ކުޅިވަރަށް ޚިދުމަތް ކުރައްވަމުން ގެންދަވާ ބޭފުޅެކެވެ. ކުޅިވަރުގެ ދަނޑުގައި މަޝްހޫރު ނަމުންނަމަ، "ދޮނާ"ގެ ހިތްޕުޅުގައި ކުޅިވަރުގެ ޝައުޤުވެރިކަން އުފެދުނީ، އުމުރުން އެންމެ 15 އަހަރުގައެވެ. އޭރު ކުދިންކޮޅެއް އެއްކޮށްލައްވައިގެން، ހޮކީ ކުޅުމުގެ އިންތިޒާމު ހަމަޖައްސަވައި، ޓީމެއް އުފައްދަވައިގެން، ހޮކީ މެޗުތައް ރާއްވަވައި ހިންގަވަން ފެށްޓެވިއެވެ. މިއީ ކުޅިވަރު ހިންގެވުމުގައި، އަޙްމަދު މުޙައްމަދު ކުރެއްވި ފުރަތަމަ ތަޖުރިބާއެވެ. އެއީ، 1974ވަނަ އަހަރުއެވެ.
ޝަރަފުވެރިކަމުގެ ޤައުމީ އިނާމު ލިބިވަޑައިގެންނެވި ހަސަންމަނިކު
ހަސަންމަނިކު
ޕާފޯމިން އާޓްސްގެ ދާއިރާއިން ޝަރަފުވެރި ކަމުގެ ޤައުމީ އިނާމު މި އަހަރު ހާސިލުކުރައްވާ ހަސަންމަނިކު، މަޝްހޫރު ނަމުން ދަންނަވާނަމަ، ރޯނުގޭ ހަސަންމަނިކަކީ، ފިލްމާއި، ޑްރާމާއާއި، ތަމްސީލު ކުޅުމާއި، އަދި މި ދާއިރާއިން މީހުން ތަމްރީނު ކުރުމުގައިވެސް ހާއްސަ ގޮތެއްގައި ފާހަގަކޮށްލެވޭ ބޭފުޅެކެވެ.
މުނިފޫހިފިލުވުމުގެ ދާއިރާގައި ހަސަންމަނިކު ހަރަކާތްތެރިވާން ފެށްޓެވީ، 1979ވަނަ އަހަރުއެވެ. މަދަރުސީ ދައުރުގައިވެސް ތަމްސީލު ލިޔުއްވައި، ތަމްސީލު ކުޅުއްވައި އުޅުއްވިއެވެ. އާންމުންގެ ތެރެއަށް ތަމްސީލު ޝޯވއެއްގައި ހަސަންމަނިކު ފުރަތަމަ ނުކުމެވަޑައިގަތީ، 11 ނޮވެންބަރު 1976 ގައި، އެ އަހަރުގެ ޖުމްހޫރީ ދުވަހުގެރޭ ބޭއްވުނު ޝޯއިންނެވެ.
