ޤައުމިއްޔަތުގެ އެކި ބަހާތައް ކިޔަވައިދޭ ކޮލެޖު "ދިވެހި ޤައުމިއްޔަތުގެ އިސްވަރު" އިފްތިތާހުކޮށްދެއްވީ ގައުމީ ދުވަހުގެ މުނާސަބަތުގައި މިއަދު ބޭއްވި ރަސްމީ ޖަލްސާގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒުއެވެ.
ދިވެހި ޤައުމިއްޔަތާގުޅޭ ޢިލްމުތައް ކިޔަވައިދޭ ކޮލެޖެއް ޤާއިމްކުރައްވާނެކަމަށް ދިވެހިބަހާއި ސަގާފަތާއި ތަރިކައާބެހޭ ވުޒާރާއިން އިއުލާންކުރީ މިއަހަރުގެ ޖެނުއަރީމަހުއެވެ.
"ދިވެހި ޤައުމިއްޔަތުގެ އިސްވަރު" އެކުލެވިގެންވަނީ މައިގަނޑު ފަސް ދާއިރާއެއްގެ މައްޗަށެވެ. އެއީ، ދިވެހި ބަސް، ދިވެހި ތާރީޚު، ދިވެހި ތަރިކަ، ދިވެހި ސުމޭކު އަދި ދިވެހި ފަންނުގެ ދާއިރާއެވެ. މި ދާއިރާތައް ހިމެނޭގޮތުން ކޮލެޖުގެ ކައުންސިލް އުފައްދާ ކޮންމެ ދާއިރާއަކަށް ޑީންއެއް ވަނީ އައްޔަންކޮށްފައެވެ.
ދިވެހި ގައުމިއްޔަތުގެ ކޮލެޖުގެ އިސްވާރުންނަކީ:
- ދިވެހި ބަހުގެ އިސްވާރު- މަރިޔަމް ތައުފީގާ
- ދިވެހި ތާރީޚުގެ އިސްވާރު- ކަށިމާ އަހުމަދު ޝާކިރު
- ދިވެހި ތަރިކައިގެ އިސްވާރު- ހަސަން ޒަރީރު
- ދިވެހި ސުމޭކުގެ އިސްވާރު- މުހައްމަދު އަބްދުލްގާދިރު
- ދިވެހި ފަންނުގެ އިސްވާރު- މަރިޔަމް އިޝާ އަޒީޒް
ޤައުމިއްޔަތުގެ ކޮލެޖް އިފްތިތާހުކުރެއްވުމަށް ފަހު ދިވެހިބަހާއި ސަގާފަތާއި ތަރިކައާބެހޭ ވަޒީރު އާދަމް ނަސީރު އިބްރާހިމް ވިދާޅުވެފައިވަނީ މި ކޮލެޖުގައި އެންމެ ފުރަތަމަ މާއްދާއަކަށް ކިޔަވައިދޭނީ ދިވެހި ތާރީހު ކަމަށެވެ. އަދި މި ކޮލެޖުގައި ތާރީހު ކިޔަވައިދޭގޮތް އެހެން ކޮލެޖުތަކާއި ތަފާތުވާނެކަންކަމަށް އާދަމް ނަސީރު ވިދާޅުވިއެވެ.
