އަލް ޖަޒީރާއިން ރިޕޯޓުކޮށްފައިވާ ގޮތުގައި މިދިޔަ އަންގާރަ ދުވަހުން ފެށިގެން ބުދަ ދުވަހާއި ހަމައަށް އިސްރާއީލުގެ ހަމަލާތަކުގައި ފަލަސްތީނުގެ 42 މީހަކު ވަނީ ޝަހީދުވެފަ އެވެ. އަދި އިސްރާއީލުގެ މި ހަމަލާތަކުގައި ފަލަސްތީނުގެ 107 މީހަކު ވަނީ ޒަޚަމްވެފައެވެ.
ފަލަސްތީނުގެ ނަސްލު ފޮހެލުމަށް ޔަހޫދީ އިސްރާއީލުން ގަސްތުގައި ރާވައިގެން ހިންގަމުން ގެންދާ ގަތުލުއާންމުތަކުގައި މެދު ނުކެނޑި ފަލަސްތީނުގެ އެތަކެއް ކުޑަކުދިންނާއި އަންހެނުން އަދި ޒުވާނުންނާއި މުސްކުޅިން ގިނަ އަދަދަކަށް ދަނީ ޝަހީދުވަމުންނެވެ.
ފަލަސްތީނުގެ ސިއްހީ ވުޒާރާއިން އާންމުކުރި އެންމެ ފަހުގެ މައުލޫމާތުތަކަށް ބަލާއިރު، ނިމިދިޔަ އަހަރުގެ އޮކްޓޫބަރު މަހުގެ ހަތްވަނަ ދުވަހުން ފެށިގެން އިސްރާއީލުން ދެމުން ގެންދާ އުދުވާނީ ހަމަލާތަކުގައި މިހާތަނަށް ފަލަސްތީނުން ޝަހީދުވެފައިވާ މީހުންގެ އަދަދު ވަނީ 40800 އަށް އަރާފަ އެވެ. އޭގެ ތެރެއިން 70 އިން ސައްތަ މީހުންނަކީ ކުޑަކުދިންނާއި އަންހެނުންނެވެ.
އަދި އިސްރާއީލުގެ ހަމަލާތަކުގައި އިތުރު 89,622 މީހުން ވަނީ ޒަހަމްވެފަ އެވެ. އަދި 20 ހާހަށްވުރެ ގިނަ މީހުން ވީނުވީއެއް ނޭންގި ގެއްލިފައިވެ އެވެ.
