އިއްޔެ އެކްސަގައި ކުރެއްވި ޕޯސްޓަގައި ކުރީގެ ރައީސް މައުމޫން ވަނީ ރައީސް ޑރ.މުއިއްޒުގެ ގައުމީ ދުވަހާ ގުޅިގެން ދެއްވި ވަރުގަދަ އަދި އަސަރުގަދަ ވާހަކަފުޅަށް ތައުރީފުކުރައްވާ މަރުހަބާ ވިދާޅުވެފައެވެ.
އެ ޕޯސްޓަށް ޖަވާބުދެއްވަމުން އާދަމް ޝަރީފް އެކްސްގައި ވިދާޅުވީ ކުރީގެ ރައީސްކަން ކުރެއްވި ބޭފުޅަކު، ވެރިކަމުގެ ހުންނެވި ބޭފުޅަކަށް ތައުރީފުގެ ބަސްފުޅެއް ވިދާޅުވެ އަދި އެކަން ބަލައިގަނެ ޝުކުރު އަދާކުރެއްވުމަކީ ވަރަށް އުފާކުރާ ކަމެއްކަމަށެވެ. އަދި އެއީ މަޑމަޑުން ރާއްޖޭގެ ޑިމޮކްރެސީ ތަސައްރަފު ފުދެމުން އަންނަކަން ދޭހަވާ ކަމެއްކަމަށްވެސް އާދަމް ޝަރީފް ވިދާޅުވި އެވެ.
ރައީސް ޑރ. މުއިއްޒު ވިދާޅުވީ ދިވެހިންނަކީ އަބަދުވެސް މިނިވަންކަމުގެ ބަތަލުންކަމަށާއި ދިވެހިގެ ތަބީއަތަކީވެސް މިނިވަންކަންމަތީގައި ދެމިތިބުންކަމަށެވެ. އެގޮތުން މި ސަރުކާރުގެ މުޅި ސިޔާސަތު ބިނާ ކުރައްވާނީ އެ އަސާސުތަކުގެ މައްޗަށްކަން ފާހަގަކުރައްވަމުން ރައީސް ވިދާޅުވީ އިއްޔެއަކީ ގައުމުގެ ބިނާކުރަން އާ ހިތްވަރާއި އާ ރޫހެއް ނެރެންވީ ދުވަސްކަމަށެވެ.
ރައީސް ޑރ މުއިއްޒު ވިދާޅުވީ ގައުމެއް ސަލާމަތްކުރުމުގައި އެންމެ މުހިންމު އެއް މަސައްކަތަކީ ރައްޔިތުން ސަލާމަތްކުރުންކަންކަމަށާއި ގައުމެއްގެ ރައްޔިތުންނަށް އަމާޒުކޮށް ހިންގޭ ދީނާ ހިލާފު، ގައުމާ ދެކޮޅު، މިނިވަންކަމަށް ނުރައްކާތެރިކަން ބޮޑު އެތައް ކަމެއް ހުންނަކަން އެމަނިކުފާނު ފާހަގަކުރެއްވިއެވެ. އަދި މިފަދަ ފިކުރީ ރާޅުތަކުން ޖީލުތަކުގެ ހިތްތަކާއި ވިސްނުންތައް ސަލާމަތް ކުރަންޖެހޭކަން އެމަނިކުފާނު ފާހަގަކުރެއްވި އެވެ.
