ބާރު ސްޕީޑުގައި ދުއްވާފައި ދިޔަ ރޭސް ކާރެއްގައި ސައިކަލެއް ޖެހި ރޭ ދަންވަރު ހިންގި އެކްސިޑެންޓްގައި ނިޔާވީ ލ. އިސްދޫ ،ބީޗްހައުސް އުުމުރުން 23 އަހަރުގެ ހަސަން ސަމާހްއެވެ. އޭނާ ނިޔާވީ އެކްސިޑެންޓް ވުމުން ހުޅުމާލެ ހޮސްޕިޓަލަށް ގެންގޮސް ފަރުވާދޭން ފެށިތާ ކުޑަވަގުތުކޮޅެއްގެ ތެރޭގައެވެ.
ސަމާހް އަކީ އެކްސިޑެންޓްވި ސައިކަލް ދުއްވަން އިން ޒުވާނާއެވެ. އޭނާގެ ސައިކަލް ފަހަތުގައި އިން ޒުވާނާއަށްވެސް މި އެކްސިޑެންޓްގައި އަނިޔާވެ ހޮސްޕިޓަލްގައި އަންނަނީ ފަރުވާދެމުންނެވެެ.
ސަމާހް އަކީ މާފުށި ޖަލުގެ އިމަޖެންސީ ސްޕޯޓް ގްރޫޕްގައި މަސައްކަތް ކުރަމުން އަންނަ ޒުވާނެކެވެ. ކަރަކްޝަންގައި ވަޒީފާ އަދާކުރާތާ ތިން އަހަރުވަނީ ވެފައިވާ ސަމާހް އަކީ ޕްރިޒަން ލާންސް ކޯޕްރަލްއެކެވެ.
ރޭގެ އެކްސިޑެންޓާއި ގުޅިގެން ކާރު ދުއްވަން އިން 26 އަހަރުގެ ޒުވާނާ ހައްޔަރުކޮށްފައިވާކަމަށް ފުލުހުން ބުނެއެވެ.
މި އެކްސިޑެންޓް ހިނގާފައިވަނީ ހުޅުމާލޭ ސެންޓަރަލް ޕާކި ކައިރިން އުރިދޫ އޮފީސް އިމާރާތް ހުންނަ ސަރަހައްދުގެވެ. އެކްސިޑެންޓް ހިނގި ސަރަހައްދަކީ ހުޅުމާލޭ ޓްރެފިކަށް އެޗްޑީސީން ގެންނަމުންދާ ބަދަލުތަކުން ދާދިފަހުން އެއްކޮޅަށް ދުއްވޭ ގޮތަށް ހަދާފައިވާ ސަރަހައްދަކެވެ.
އެކްސިޑެންޓްވި ކާރުގައި ޖެހި ސައިކަލް އޮތީ ވަރަށް ދުރަށް ވިއްސައިގެން ގޮސްފައެވެ. އަދި ސައިކަލް ވެއްޓިފައި އޮތް ސަރަހައްދުގައި ގިނަ އަދަދެއްގެ ލޭ ފެންނަ ހުއްޓައެވެ.
