ރައީސް މިހެން ވިދާޅުވީ ރޭ ހުޅުމާލޭގައި ހިނގި އެކްސިޑެންޓެްްގައި ޒުވާނަކި ނިޔާވުމާއި ގުޅިގެން އެކްސްގައި ކުރެއްވި ޕޯސްޓެއްގައެވެ. ރޭގެ އެކްސިޑެންޓްގައި ނިޔާވީ ލ. އިސްދޫ ،ބީޗްހައުސް އުުމުރުން 23 އަހަރުގެ ހަސަން ސަމާހްއެވެ. އޭނާ ނިޔާވީ އެކްސިޑެންޓް ވުމުން ހުޅުމާލެ ހޮސްޕިޓަލަށް ގެންގޮސް ފަރުވާދޭން ފެށިތާ ކުޑަވަގުތުކޮޅެއްގެ ތެރޭގައެވެ.
ރޭ ހިނގި ނުރައްކާތެރި އެކްސިޑެންޓަށް އިޝާރަތްކުރައްވާ ރައީސް މުއިއްޒު ވިދާޅުވީ މިފަދަ ހިތާމަވެރި ހާދިސާތައް ހިނގުން ހުއްޓުވުމަކީ އެކަމުގައި ހުރިހާ ފަރާތްތަކެއްގެވެސް އެއްބާރުލެއްވުން ބޭނުންވާ ކަމެއްކަމަށެވެ.
ނުރައްކާތެރިކޮށް ބާރު ސްޕީޑުގައި ދުއްވާ ދުއްވުންތައް ހުއްޓުވައި، މާލެއާއި ރާއްޖޭގެ އެހެނިހެން ރަށްރަށުގެ މަގުތަކަކީ އެންމެންނަށްވެސް އަމާންކަމާއެކު ބޭނުންކުރެވޭނެ ތަންތަންކަމުގައި ހެދުމަށްޓަކާ ސަރުކާރުން ކުރަންޖެހޭ އެންމެހާ ކަންކަން މިސަރުކާރުން ކުރާނެކަމުގެ ޔަޤީންކަން ހުރިހާ ރައްޔިތުންނަށް ދެއްވާކަމަށްވެސް ރައީސް މުއިއްޒު ވިދާޅުވިއެވެ.
ރޭގެ އެކްސިޑެންޓްގައި ނިޔާވި ސަމާހުގެ އާއިލާއަށް ރައީސް މުއިއްޒު ވަނީ ތައުޒިޔާ ފޮނުއްވައިފައެވެ.
