ހދ ޖުޑީޝަލް ދާއިރާއަށް ނިސްބަތްވާ މީހުން ދިރިއުޅޭ 13 ރަށުގައި ގާއިމުކޮށްފައިވާ މެޖިސްޓްރޭޓް ކޯޓުތަކުގެ މެޖިސްޓްރޭޓުންނާއި މުވައްޒަފުން ބައިވެރިވި މި ބައްދަލުވުމަކީ، މި ގޮތަށް އަތޮޅު ފެންވަރުގައި ހދ ޖުޑީޝަލް ދާއިރާގައި ބޭއްވުނު ފުރަތަމަ ބައްދަލުވުމެވެ.
ބައްދަލުވުން ޝަރަފުވެރިކޮށްދެއްވީ ޖުޑީޝަލް ސަރވިސް ކޮމިޝަނުގެ ނައިބު ރައީސް އަދި ދިވެހިރާއްޖޭގެ ހައިކޯޓުގެ ފަނޑިޔާރު އަލްއުސްތާޛު މުޙައްމަދު ނިޔާޒް އެވެ. ޝަރަފުވެރި މެހެމާނުގެ ވާހަކަފުޅުގައި، ފަނޑިޔާރުންގެ މަސައްކަތުގައި ކޯޓުތަކުގެ އިދާރީ މުވައްޒަފުންގެ ދައުރު ވަރަށް ބޮޑު ކަމަށާއި، އެ މުވައްޒަފުން ކުރައްވަމުން ގެންދަވާ މަސައްކަތް އެކަމުގެ އަގުވަޒަންކުރުމަކީ، މުހިއްމު ކަމެއްކަމަށް ވިދާޅުވި އެވެ.
ބައްދަލުވުމުގައި، ފާއިތުވި 2023 ވަނަ އަހަރު ހާޒިރީއަށް ނަމޫނާ މުވައްޒަފުންނާއި މަސައްކަތަށް ނަމޫނާ މުވައްޒަފުން ފާހަގަކޮށް އެ މުވައްޒަފުންގެ އަގު ވަޒަންކޮށްފައިވެއެވެ. އަދި، ހދ ޖުޑީޝަލް ދާއިރާއަށް ހިދުމަތް ކޮށްދެއްވައި ޝަރަފުވެރިކަމާއެކު ރިޓަޔަރ ކުރައްވާފައި ތިއްބެވި މެޖިސްޓްރޭޓުންނަށް ހިދުމަތު ފިލާ އެރުވުން އޮތެވެ.
މީގެ އިތުރުން ހދ ޖުޑީޝަލް ދާއިރާގެ މެޖިސްޓްރޭޓް ކޯޓުތަކުގައި 25 އަހަރަށްވުރެ ދިގު މުއްދަތަކަށް ހިދުމަތް ކޮށްދެއްވަމުން ގެންދަވާ މުވައްޒަފުންނަށް ދިގު މުއްދަތުގެ ޚިދުމަތުގެ ފިލާ ދީފައިވެ އެވެ.
