ޕޮލިސް އިން ސްޓެލްކޯ ކޮޅަށް 10 ލަނޑު ޖެހިއިރު، ޕޮލިހުގެ ފުރަތަމަ މެޗުގައި ޔޫތު ރެކްރިއޭޝަން ކްލަބް ބަލިކުރީ 17-0 އިންނެވެ. ބާކީ މެޗެއް އޮއްވައި، ޕޮލިހުން މި ވަނީ ސެމީގެ ޖާގަ ޔަގީންކޮށްފަ އެވެ.
ޕޮލިސް – ސްޓެލްކޯ މެޗުގައި ޕޮލިހުގެ މަރިޔަމް ރިފާ އާއި ފާތިމަތު ތީބާ ވަނީ ހެޓްރިކެއް ހަދައިފަ އެވެ. މި މެޗުގައި ޖެހި ތިން ގޯލާ އެކު ރިފާ މި ފަހަރުގެ މުބާރާތުގައި ޖެހި ގޯލުގެ އަދަދު ވަނީ 12 އަށް އަރައިފަ އެވެ. ރޭގެ މެޗުގައި، ޕޮލިހުގެ އަނެއް ގޯލުތައް ޖެހީ، ފާތިމަތު ސައިނާ، އައިމިނަތު ޒާހިޔާ، ރާނިޔާ އިބްރާހިމް އަދި އައިޝަތު އަމީޝާ ސަލާމް އެވެ.
ގްރޫޕް އޭގެ އެއް ވަނައިގައި ހަ ޕޮއިންޓާ އެކު ޕޮލިސް އޮތްއިރު، ދެ ވަނައިގައި އޮތް ސްޓެލްކޯ އަށް ވަނީ ތިން ޕޮއިންޓް ލިބިފަ އެވެ. ތިން ވަނައިގައި އޮތް ދަރުމަވަންތަ އާއި ހަތަރެއްގައި އޮތް ޔޫތު ރެކްރިއޭޝަން ކްލަބަށް އަދި ޕޮއިންޓެއް ނުލިބެ އެވެ.
