އެޗްޑީސީން މިހާރު އަންނަނީ ޕޮލިސް ފްލެޓުތައް ކުރިމައްޗަށް ވާ ގޮތަށް އޮތް އެ ބިން ސާފުކޮށް، ބިންގަނޑު އެއްވަރު ކުރުމުގެ މަސައްކަތް މިހާރު އަންނަނީ ކުރަމުންނެވެ.
އެ ސަރަހައްދުގައި ހުންނަވާ ނޫސްވެރިންނާ ވާހަކަ ދައްކަވަމުން ޓްރާންސްޕޯޓް މިނިސްޓަރު މުހައްމަދު އަމީން މިއަދު ވިދާޅުވީ، ޓެކްސީ އާއި އެހެން ބޭނުންތަކަށް ވެހިކަލްތައް ދުއްވާ މީހުންގެ އެންމެ ބޮޑު އެއް ކަންބޮޑުވުމަކީ ޕާކު ކުރާނެ ޖާގަ ނެތުން ކަމަށެވެ.
އެ މައްސަލަ ހައްލުކޮށް، މާލެ އާއި ހުޅުމާލެ އަކީ އަމާން ތަނަކަށް ހެދުމުގެ ބޭނުމުގައި 90،000 އަކަފޫޓުގެ އެ ބިން ވަގުތީ ގޮތުން ބޭނުން ކުރަން ނިންމާފައިވާ ކަމަށް އަމީން ވިދާޅުވި އެވެ.
އަމީން އިތުރަށް ވިދާޅުވީ މިތަނުގެ އެއްބައި ހާއްސަ ކުރަނީ ހަތަރުފުރޮޅުލީ ވެހިކަލްތަކަށެވެ. އެ ގޮތުން 50،000 އަކަފޫޓް ވަނީ އެކަމަށް ހާއްސަކޮށްފަ އެވެ.
އަނެެއް 40،000 އަކަފޫޓް ބާއްވާނީ ޓޯކުރާ ވެހިކަލްތައް ބޭއްވުމަށެވެ.
އެ ބޮޑު ބިމުގައި ޕާކު ކުރެވޭނެ ގޮތް ހަދަމުން އަންނަނީ ހުޅުމާލޭގައި ޕާކިން އިމާރާތްތައް އަޅަންދެން ކަމަށް މިނިސްޓަރު ވިދާޅުވި އެވެ.
ހަތަރުފުރޮޅުލީ އުޅަނދުތަކާ ޓޯކުރާ އުޅަނދުތައް ބަހައްޓަން ހަމަޖެއްސި ބިމާއި ހަވާލުވެ މިނިސްޓަރު އަމީން ނޫސްވެރީންނަށް މައުލޫމާތު ދެއްވަނީ
ޗީފް ސުޕްރިޓެންޑެންޓް އޮފް ޕޮލިސް އަދި ހުޅުމާލެ ޕޮލިސް ހެޑް މުހައްމަދު ދާއޫދު ވިދާޅުވީ ވަގުތީ ޕާކިން ސަރަހައްދެއް ހަމަޖެއްސުމަކީ މާލޭއާއި ހުޅުމާލޭގެ މަގުތައް ރައްކާތެރި ގޮތުގައި ބޭއްވުމަށްޓަކައި ކުރެވޭ މަސައްކަތަށް އެހީތެރިވެދޭނެކަމެއްކަމަށެވެ.
ޓްރެފިކް ތޮއްޖެހުމާއި ޕާކިންގެ ދަތިކަން ހައްލުކުރުމަށްޓަކައި ގިނަ މަސައްކަތްތަކެއް ކުރަން ސަރުކާރުން ވަނީ ވައުދުވެފަ އެވެ. އެޗްޑީސީން ވަނީ 4،000 ޔުނިޓު ހިމެނޭ ޕާކިން ބިލްޑިންގްތަކެއް އަޅަން ޕްރޮޕޯސަލް ހުށަހަޅަން ފުރުސަތު ހުޅުވާލައިފަ އެވެ.
