ރައީސް ޔާމީން މިހެން މި ވިދާޅުވީ މިދިޔަ އޯގަސްޓު މަހު ރާއްޖޭގެ ރަސްމީ ރިޒާވަށް 11 އިންސައްތަ ކުރިއެރުމެއް ލިބި، ހުރި ޑޮލަރުގެ އަދަދު 444 މިލިއަނަށް އިތުރުވެފައިވާކަމަށް އެމްއެމްއޭއިން ހާމަކޮށްފައި ވަނިކޮށެވެ.
ރިޒާވް އިތުރުވިކަމަށްް އެމްއެމްއޭއިން ބުނެފައި މިވަނީ ބޭނުން ކުރެވޭ ޑޮލަރު ރިޒާވު ހުސްވި ކަމަށް ބުނެ ފެތުރުނު ވާހަކަތައް އެ ބޭނުންކުން ދޮގުކުރިތާ ގާގްހަޑަކަށް 20 ދުވަސް ފަހުންނެވެ.
ޕީއެންއެފުން ރޭ ބޭއްވި ޖަލްސާއެއްގައި ވާހަކަ ދައްކަވަމުން ޔާމީން ވިދާޅުވީ މަރުކަޒީ ބޭންކް އެމްއެމްއޭއަކީ ސިޔާސީ ވާހަކަ ދައްކާ ތަނަކަށް ވެގެން ނުވާނެކަމަށާއި ރާއްޖޭގެ މާލީ ހާލަތު ސާފު ބަހުން ރައްޔިތުންނަށް ބުނެދޭންޖެހޭކަމަށެވެ.
ހުސްވުމާއި ގާތުގައި އޮތް ރިޒާވް އިތުރުވިކަމަށް އެމްއެމްއޭއިން ބުނާއިރު ރާއްޖޭގެ ޓޫރިޒަމް ސީޒަން ނިމިފައިވާކަން ފާހަގަކުރައްވަމުން ޔާމީން ވިދާޅުވީ ބޭރުގެ ރެވެނިއު އުފައްދާ އިންވެސްޓްމަންޓްތައް މިވަގުތު ރާއްޖޭގައި ނުހިނގާކަމަށެވެ. އެހެންކަމުން އެމްއެމްއޭގެ ރިޒާވް އިތުރުވުމަކީ ސިޔާސީ ބޭނުމަށް ދެއްކި ވާހަކައެއްކަމަށް ރައީސް ޔާމީން ވަނީ ތުހުމަތުކުރައްވާފައެވެ.
ރައީސް ޔާމީންގެ ވާހަކަތަކުން، ޔޫޒަބަލް ރިޒާވް އިތުރުކުރަން އެމްއެމްއޭއިން ސޮވަރިން ޑިވެލޮޕްމަންޓު ފަންޑު (އެސްޑީއެފް)އިން ފައިސާ ނެގިކަމަށް އެމަނިކުފާނު ތުހުމަތުކުރައްވައެވެ. އެކަން އެގޮތަށް ނުކުރާކަން ރައްޔިތުންނަށް ޔަގީންކޮށް ކަށަވަރުކޮށްދޭންޖެހޭކަމަށްވެސް ޔާމީން ވިދާޅުވިއެވެ.
އެމްއެމްއޭއިން މިދިޔަ އާދިއްތަ ދުވަހު އާއްމުކޮށްފައިވާ ތަފާސް ހިސާބުތައް ދައްކާގޮތުން ޖުލައި މަހު ރިޒާވުގައި ހުރީ 395 މިލިއަން ޑޮލަރެވެ. އެމްއެމްއޭއިން ބުނީ މިދިޔަ މަހުގެ ރިޒާވަށް 49 މިލިއަން ޑޮލަރު އިތުރުވެ އެ އަދަދުވަނީ 444 މިލިއަން ޑޮލަރަށް އިތުރުވެފައެވެ.
ޖުލައި މަހު ޔޫސަބަލް ރިޒާވުގެ ގޮތުގައި ހުރީ 45 މިލިއަން ޑޮލަރެވެ. ޖުލައި މަހަކީ މިދިޔަ ތިން އަހަރުގެ ތެރޭގައި ރިޒާވު އެންމެ ދަށްވި މަހެވެ. ރިޒާވް އިތުރުވުމާއި އެކު ޔޫޒަބަލް ރިޒާވަށްވެސް މިވަނީ ކުރިއެރުން އައިސްފައެވެ. އެގޮތުން ޔޫޒަބަލް ރިޒާވްވެސް ވަނީ 26 އިންސައްތަ އިތުރުވެފައެވެ. ޔޫޒަބަލް ރިޒާވްގައި މިވަގުތު ހުރީ 61 މިލިއަން ޑޮލަރެވެ.
