"ސީއެންއެމް" އަށް މައުލޫމާތު ހިއްސާކުރަމުން ހޮޅުދޫ ކައުންސިލް ރައީސް ރިލްވާން ވިދާޅުވީ، އެރަށުން ޒަހަމްތަކަކާއި އެކު މަރުވެފައި އޮތް އަންހެނަކު ފެނިފައިވާއިރު، ކައިރީގައި ވަޅިއެއްވެސް އޮތްކަމަށެވެ.
ފުލުހުން ބުނި ގޮތުގައި މަރުވެފައިވަނީ ނ. ހޮޅުދޫ، މާރަނގަ، ޒަކިއްޔާ މޫސާ މަނިކު (50އ) އެވެ.
އެރަށުން ވާހަކަ ދެއްކި މީހަކު ބުނީ އޭނާ ފެނުނުއިރު އޮތީ ކަރުގައި ވަޅި އަޅާފައިކަމަށެވެ. އަދި އޭނާ ޒަހަމްތަކާއި އޮއްވާ ފެނުނު އެ ސަރަހައްހު ކުނިކަހަން ނުކުމެ އުޅުނު ބަޔަކަށް ކަމަށްވެސް އެމީހާ ބުންޏެވެ.
ފުލުހުން ބުނީ މި މީހާ މަރުވެފައި އޮތްކަމުގެ ރިޕޯޓް ލިބުނީ މިއަދު ހެނދުނުކަމަށެވެ. އަދި އެމީހާ އެރަށު ހެލްތް ސެންޓަރަށް ގެންދިޔައިރުވެސް މަރުވެފައިވާކަމަށް އެ ސެންޓަރާއި ހަވާލާދީ ފުލުހުން ބުނެ އެވެ.
ފުލުހުން އިތުރަށް ބުނީ، މި މައްސަލަ ތަހުގީގު ކުރުމަށް މާލެ އިން ހާއްސަ ޓީމެއް އެރަށަށް ދިއުމަށް މިހާރު ފުރާފައިވާ ކަމަށެވެ. އަދި މިވަގުތު ވެސް ރަށުގައި ފޮރެންސިކް ޓީމެއް އަންނަނީ ހަރަކާތްތެރިވަމުންނެވެ.
