އިޒްރޭލުން ފަލަސްތީނުގައި ކުރިއަށްގެންދާ ގަތުލުއާންމާ ދެކޮޅު ހެދުމުގެ ގޮތުން، އިޒްރޭލު ޕާސްޕޯޓްގައި ރާއްޖެއަށް މީހުން އެތެރެކުރުން މަނާކުރުމަށްޓަކައި އިމިގްރޭޝަން ގާނޫނަށް ބަދަލު ގެންނަން ހުށަހެޅި ބިލު ސަލާމަތީ ހިދުމަތްތަކާ ބެހޭ ކޮމިޓީ (241 ކޮމިޓީ) ގައި އޮންނަަތާ މިއަދަށް މިވަނީ ތިން މަސްވެފައެވެ.
މި ބިލުގެ މަސައްކަތް ކުރިޔަށް ނުދާތީ އެކަމުގެ ސަބަބު އޮޅުން ފިލުވުމަށް އެ ބިލް ހުށައެޅުއްވި ގަލޮޅު ދެކުނު ދާއިރާގެ އެމްޑީޕީ މެންބަރު މީކާއިލް އަހުމަދު ނަސީމް ވަނީ މަޖިލީހުގެ ރައީސްއަށް ސިޓީއަކުންވެސް ހުށައަޅާފައެވެ.
ދުވަސްތަކަށްފަހު މިއަދު ނޫސްވެރިންނާއި ބައްދަލުކޮށް ވާހަކަ ދައްކަވަމުން ސަރުކާރުގެ ތަރުޖަމާނު ހީނާ ވަލީދު ވިދާޅުވީ މި ސަރުކާރުން ފަލަސްތީނާއި މެދު ގެންގުޅޭ ސިޔާސަތު ބަދަލު ނުވާކަމަށެވެ. އެހެންކަމުން މަޖިލީހުގައި އޮތް ބިލުގެ މައްސަލަ ކުރިޔަށްދާނެކަމަށެވެ.
އިމިގްރޭޝަން ގާނޫނަށް ހުށައަޅާފައިވާ އިސްލާހުގައި ބުނެފައި ވަނީ ރާއްޖެ އެތެރެ ނުވެވޭނެ މީހުންގެ ތެރޭގައި "އިޒްރޭލު ޕާސްޕޯޓު ގެންގުޅޭ މީހުން (މީގެ ތެރޭގައި އިޒްރޭލުގެ ޕާސްޕޯޓުގެ އިތުރުން، އެހެން ގައުމެއްގެ ޕާސްޕޯޓު ގެންގުޅޭ މީހުން ވެސް ހިމެނޭ) ކަމަށެވެ.
އިޒްރޭލު ޕާސްޕޯޓު ރާއްޖޭގައި މަނާކުރަން މަސައްކަތް ކުރާކަމަށް ސަރުކާރުން ބުނާއިރު އެކަމުގައިވެސް ސަރުކާރުގެ ހެޔޮ ނިޔަތެއް ނެތް ކަމަށް ކުރީގެ ރައީސް އަބްދުﷲ ޔާމީންވެސް ވަނީ ވިދާޅުވެފަ އެވެ.
