ރާއްޖޭގައި ހުންނަ އުރީދޫ މޯލްޑިވްސް އޮފީހަށް ގަތަރުގެ ސަފީރު ކުރެއްވި މި ޒިޔާރަތުގައި ސަފީރަށް މަރުހަބާ ދެންނެވީ އުރީދޫ މޯލްޑިވްސްގެ ސީއީއޯ ހާލިދު އަލް ހަމާދީ ގެ އިތުރުން އުރީދޫ މޯލްޑިވްސްގެ އިސް ވެރިންނެވެ.
ސަފީރުގެ މި ޒިޔާރަތުގައި ރާއްޖެއާއި ގަތަރާ ދެމެދު އޮތް ބަދަހި ގުޅުމުގެ މައްޗަށް އަލިއަޅުއްވާލައްވާފައިވެއެވެ. އެގޮތުން އުރީދޫ މޯލްޑިވްސްއަކީ ގަތަރުން ކުރާ އެންމެ ބޮޑު ފޮރިން އިންވެސްޓްމަންޓްގެ ގޮތުގައި ވަނީ ފާހަގަކުރައްވާފަ އެވެ.
އަދި މި ބައްދަލުކުރެއްވުމުގައި، ރާއްޖޭގެ ޑިޖިޓަލް ލޭންޑްސްކޭޕް ކުރިއެރުވުމުގައި އުރީދޫ މޯލްޑިވްސްއިން ކުރަމުން ގެންދާ މަސައްކަތްތަކާއި، އިނޮވޭޝަން ކުރިއެރުވުމުގައި އުރީދޫ މޯލްޑިވްސްއިން އަދާކުރާ ދައުރާއި، މުޖުތަމަޢަށް އަމާޒުކޮށްގެން ކުރިއަށް ގެންދާ މަސައްކަތްތަކުގެ މައްޗަށް ވެސް ވަނީ އަލިއަޅުއްވާލައްވާފަ އެވެ.
ގަތަރުން ރާއްޖެއަށް ކަނޑައަޅުއްވާފައިހުންނަވާ ސަފީރުއާއިއެކު އުރީދޫގެ އިސްވެރިން - ފޮޓޯ: އުރީދޫ
ސަފީރުގެ މި ދަތުރުފުޅުގައި އުރީދޫ މޯލްޑިވްސްގެ ހެޑްކުއާޓާސްއަށް ޒިޔާރަތްކުރައްވައި، ކުރަމުން ގެންދާ ހާއްސަ ޕްރޮޖެކްޓްތަކުގައި ހަރަކާތްތެރިވާ މުހިންމު ޓީމްތަކާ ބައްދަލުކުރެއްވި އެވެ.
މީގެ އިތުރުން ޑިޖިޓަލް އެކްސެސިބިލިޓީ އިތުރުކޮށް ރާއްޖޭގެ އެކި ކަންކޮޅުތަކުގައި މުޖުތަމައުތައް ބާރުވެރިކުރުވުމުގެ މަގްސަދުގައި އުރީދޫއިން ކުރިއަށް ގެންދާ މަސައްކަތްތަކާ ބެހޭ ގޮތުން ވެސް ސަފީރު ވަނީ މައުލޫމާތު ހޯދަވާފަ އެވެ.
