ވިލާ ކޮލެޖްގެ ފެކަލްޓީ އޮފް ބިޒްނަސް މެނޭޖުމަންޓްގެ ނަން "ގާސިމް އިބްރާހިމް ސްކޫލް އޮފް ބިޒްނަސް" ބަދަލުކުރުމުގެ އިތުރުން މިއަދު ވަނީ އެ ކޮލޮޖުގައި ވީ އިގްނައިޓް ނަމުގައި ބިޒްނަސް އިންކިއުބޭޝަން ސެންޓަރެއްވެސް ހުޅުވާފައެވެ.
މިކަމަށް މިއަދު އެ ކޮލޮޖުގައި ބޭއްވި ރަސްމިއްޔާތު ޝަރަފުވެރިކޮށްދެއްވީ އިގްތިސާދާއި ބެހޭ ވަޒީރު މުހައްމަދު ސައީދުއެވެ. މި ރަސްމިއްޔާތުގައި ވިލާ ކޮލެޖުގެ އިސްވެރިންނާއި ސަރުކާރުގެ ބައެއް އިދާރާތަކުގެ ވެރިން ވަނީ ބައިވެރިވެފައެވެ.
ގާސިމް އިބްރާހިމް ބިޒްނަސް ސްކޫލްގެ ޑީން އަކީ އަބްދުﷲ ނާފިޒްއެވެ. ޑެޕިއުޓީން ޑީން ޑރ. ޑަމިތު ގެންގޮޑަވިލެޖްއެވެ.
ބިޒްނަސް ސްކޫލަށް ގާސިމް އިބްރާހިމް ނަން އިހްތިޔާރު ކުރީ ވިޔަފާރިއާއި އިގްތިސާދީ ދާއިރާއަށް ބަލާއިރު އެ ނަމަކީ އެކަމަށް އެންމެ އެކަށޭނެ ނަންކަމަށް ފެންނާތީކަމަށް ވިލާ ކޮލެޖުން ބުނެއެވެ.
ބިޒްނަސް އިންކިއުބޭޝަން ސެންޓަރުގެ ޕާޓްނަރުން
- ބިޒްނަސް ސެންޓާ ކޯޕަރޭޝަން
- ދިރާގު
- ވާވޭ ޓެކްނޮލަޖީ
- ސްޕާކް ހަބް
- ވުމަން އިން ޓެކް
- ސޮނެވާ ނަމޫނާ
- އޮކްސިކާ ޕްރައިވެޓް ލިމިޓެޑް
- އޭޝިއާ ޕެސިފިކް އިންސްޓިޓިއުޓް އޮފް މަނީ އެންޑް އެންޓަޕްރިނިއާޝިޕް ޑިވިލޮޕްމެންޓް
- ސްކުއާ ހަބް
- ފެނަކަ ކޯޕަރޭޝަން ލިމިޓެޑް
- ކަނޑުފާ ފައުންޑޭޝަން
- ވިލާ ޝިޕިން އެންޑް ޓްރޭޑިން ކޮމްޕެނީ
މި ރަސްމިއްޔާތުގައި ވާހަކަ ދައްކަމުން ގާސިމް އިބްރާހިމް ބިޒްނަސް ސްކޫލްގެ ޑީން އަބްދުﷲ ނާފިޒް ވިދާޅުވީ އަމާޒަކީ އެ ސްކޫލަކީ ދުނިޔޭގެ ފެންވަރުގެ ބިޒްނަސް ސްކޫލަކަށް ހެދުންކަމަށެވެ. އަދި ތަނުގެ ނަން ބަދަލުވާއެކު ގެނައި ބަދަލަކީ އުއްމީދީ ތަސައްވުރަކާއެކު ގެނެވުނު މުހިއްމު ބަދަލެއްކަމަށެވެ.
