ރަތްމަންދޫއިން އެހެން ރަށަކަށް ބަދަލުކޮށްދިނުމަށް އެދި އެ ރަށުގެ ރައްޔިތުން ސޮއިކޮށް ސަރުކާރަށް ވަނީ ޕެޓިޝަނެއް ހުށައަޅާފައެވެ.
އެ ޕެޓިންޝަންގައި 114 ރައްޔިތުން ސޮއިކޮށްފައިވާކަމަށް އެރަށު ކައުންސިލުން ބުނެއެވެ. ޕެޓިޝަންގައި ރައްޔިތުން ބުނެފައިވަނީ އެރަށުން އަސާސީ ހިދުމަތްތައް ލިބުގައި އެތައް ގޮތަކުން ދަތިތައް ހުރިކަމަށެވެ. އެހެންކަމުން އެހެން ރަށަކަށް ބަދަލުކޮށްދިނުމަށް ސަރުކާރުގައި ވަނީ އެދިފައެވެ. އަދި ކުދި އާބާދީތަކަށް ސަރުކާތުން ގެންގުޅޭ ވިސްނުންވެސް ހޯދަން ރައްޔިތުން ވަނީ އެދިފައެވެ.
އާބާދީގައި 300 މީހުންވެސް ހަމަނުވާ މ. ރަތްމަންދޫގައި ދިރިއުޅެމުން އަންނަނީ 100 އެއްހާ މީހުންނެވެ. އެހެންނަމަވެސް އެރަށަށް ބޭނުންވާ ބައެއް އަސާސީ ހިދުމަތްތައް ހަމަޖައްސާދިނުމުގެ މަސައްކަތްތައް އޮތީ ފަށާފައެވެ. އެގޮތުން ފެނާއި ނަރުދަމާ ގާއިމުކުރުމުގެ މަސައްކަތް އަންނަނީ ކުރަމުންނެވެ.
ރަތްމަންދޫ ރައްޔިތުން އެހެން ރަށަކަށް ބަދަލުވާން އެދިފައިވާއިރު ހިރިމަރަދޫ ރައްޔިތުންވެސް ތުލުސްދޫއަށް ބަދަލުކޮށްދިނުމަށް އެދިފައިވާކަމަށް ލޯކަލް ގަވަމްންޓް މިނިސްޓަރު އާދަމް ޝަރީފު އުމަރު ވަނީ ވިދާޅުވެފައެވެ.
