އެޗްއާރްސީއެމްއިން ބުނީ އެ ބައްދަލުވުމުގައި ގެދޮރުވެރިޔާ މަޝްރޫއާ ގުޅިގެން ކޮމިޝަނުން ބަލަމުންދާ މައްސަލައަށް ބޭނުންވާ މައުލޫމާތު ހޯދާފައިވާ ކަމަށެވެ.
ހައުސިން މިނިސްޓްރީއާ ހަވާލާދީ އެޗްއާރްސީއެމުން ބުނީ ރައްޔިތުންގެ ގިނަ ކަންބޮޑުވުންތަކެއް ހުރި މި މައްސަލައަށް އަވަސް މުއްދަތެއްގެ ތެރޭގައި ކަމާގުޅުންހުރި އިދާރާތަކާ ގުޅިގެން ހައްލު ހޯއްދަވައިދެއްވުމަށް ވަރަށް ބޮޑަށް މަސައްކަތް ކުރަަމުން ގެންދާ ކަމަށެވެ.
އަދި އެ ކޮމިޝަނުން އުންމީދުކުރަނީ، ގިނަ ރައްޔިތުންތަކެއްގެ ކަންބޮޑުވުން އެކުލެވިފައިވާ މި މައްސަލައަށް އަވަށް ހައްލެއް ލިބުން ކަމަށް ވެސް ބުނެފައިވެއެވެ.
މިދިޔަ ސަރުކާރުގެ ބޯހިޔާވަހިކަމުގެ މަޝްރޫއުތަކުން ރައްޔިތުންނަށް ލިބުނު ގޯއްޗާއި ފްލުޓު ދިނުން ލަސްވާތީ ރައްޔިތުން އަންނަނީ ކަންބޮޑުވުން ފާޅުކުރަމުންނެވެ. އެގޮތުން، ހުޅުމާލޭގައި އަޅާ 4،000 ފުލެޓު ދިނުން ލަސްވާތީ މި ފަހުން ވެސް މާލޭގައި ރައްޔިތުން ވަނީ އެކި ފަހަރުމަތިން މުޒާހަރާ ކޮށްފައެވެ.
އެ މައްސަލައާ ގުޅިގެން، ފުލެޓު ލިސްޓު ބާތިލުނުކުރުމަށް އެދި ރައްޔިތުންގެ މަޖިލީހަށް ޕެޓިޝަނެއް ވެސް ހުށަހަޅައިފައިވެއެވެ. އެ މައްސަލަ އެ ކޮމިޓީން މިހާރު އަންނަނީ ދިރާސާކުރަމުންނެވެ.
ގެދޮރުވެރިޔާ ސްކީމްގެ ދަށުން ފްލެޓް ލިބޭނެ ކަމަށް ކުރިން އިއުލާންކޮށްފައިވާ ލިސްޓު ރިވިއު ކުރުމަށް ފަހު ފައިނަލް ލިސްޓު އަންނަ މަހު އާންމުކުރާނެ ކަމަށް މިނިސްޓަރު ހައިދަރު ވަނީ މިދިޔަ ޖުލައި މަހު ވިދާޅުވެފަ އެވެ.
