އާންމު ގޮތެއްގައި ޓޮޕް އެޗީވާސް އެވޯޑަކީ ސަރުކާރުގެ ނުވަތަ އަމިއްލަ ކުންފުނިތަކުން ސްޕޮންސާ ކޮށްގެން، ކުންފުނިތަކުގެ ވެރިން އިސް ސަފުގައި ތިއްބަވައިގެން ކުރިއަށްގެންދާ ޖަލްސާއެކެވެ.
މިއަދު ޓޮޕް އެޗީވާސް އެވޯޑް ހެނދުނާއި މެންދުރާއި ރޭގަނޑުގެ ދަންފަޅިތަކަށް ބަހައިލައިގެން ކުރިއަށްގެންދާއިރު، ތިން ދަންފަޅި ވެސް ޝަރަފުވެރިކޮށްދެއްވަނީ ރައީސް ޑރ. މުހައްމަދު މުއިއްޒެވެ. މިއީ މި ހަފުލާގެ ހުރިހާ ދަންފަޅިއެއް ރައީސް ޝަރަފުވެރިކޮށްދެއްވާ ފުރަތަމަ ފަހަރެވެ. އަދި މިފަހަރު ދަރިވަރުންނަށް ޓްރޮފީއާއި ހަނދާނީ ލިޔުމާއި އިނާމުތައް ހަވާލުކޮށްދެއްވަނީ ރައީސާއި މިނިސްޓަރުންނެވެ.
ޓޮޕް އެޗީވާސް ޖަލްސާގެ ތެރެއިން -- ފޮޓޯ: އެޑިއުކޭޝަން މިނިސްޓްރީ
އެޑިއުކޭޝަނުން ބުނީ، މިފަހަރު އިނާމު ލިބޭ 441 ދަރިވަރުންނަށް ގައުމީ ފެންވަރުގައި ޝަރަފްދިނުމަށް މިއަދު ހެނދުނުން ފެށިގެން މިރެއާ ހަމަޔަށް ކުރިއަށްދާ 3 ރަސްމިއްޔާތުގައި ވެސް ރައީސް ޑރ.މުހައްމަދު މުއިއްޒު ބައިވެރިވެވަޑައިގަތުމަކީ، ތައުލީމަށް އަދި ޒުވާން ދަރިވަރުންގެ ކުރިއެރުމަށާއި ފާގަތިކަމަށް އެމަނިކުފާނު ދެއްވާ އަހައްމިއްޔަތުގެ ހެއްކެކެވެ.
މަތީ އަރުތަވެރިންގެ އިނާމު ދިނުމަށް ދަރުބާރުގޭގައި ބޭއްވި ރަސްމިއްޔާތުގައި، ރައީސް ޑރ. މުއިއްޒު ދަރިވަރަކަށް އެވޯޑު ހަވާލު ކުރައްވަނީ -- ފޮޓޯ: ރައީސް އޮފީސް
އޭ ލެވެލް އިމްތިހާނުގައި ދެ އަހަރު ތެރޭ ދިވެހިރާއްޖޭގެ 3268 ދަރިވަރުން ފުރިހަމަ ކުރި އެވެ. އޭގެ ތެރެއިން 376 ދަރިވަރުން ގައުމީ ގަދަ 10 ގައި ވަނީ ހިމެނިފަ އެވެ.
މުޅި ރާއްޖެއިން އެންމެ ގަދަ 10 ގެ އެއްވަނަ 17 ދަރިވަރަކު ހާސިލުކުރިއިރު ވަކިވަކި މާއްދާތަކުން ނުވަ ދަރިވަރަކު ވަނީ ދުނިޔެއިން އެއްވަނަ ހޯދާފަ އެވެ.
އޭގެއިތުރުން ތިން އޭ ސްޓާ ހޯދައިގެން "އޭލެވެލް ސެޓްފިކެޓް އޮފް އެކްސެލެންސް" 27 ދަރިވަރަކު ހާސިލުކުރި އެވެ.
އަދި ސާނަވީ އިމްތިހާނުތަކުން ދުނިޔޭގެ ފެންވަރުގައި މަތީ ވަނަ ހޯދި ދަރިވަރުންނާއެކު ޖުމްލަ 441 ދަރިވަރުންނަށް މިއަދުގެ ހަފުލާތަކުގައި އިނާމު ދިނެވެ.
މަތީ އަރުތަވެރިންގެ އިނާމު ދިނުމަށް ދަރުބާރުގޭގައި ބޭއްވި ރަސްމިއްޔާތުގައި ސްކޫލު ދަރިވަރުންތަކެއް އައިޓަމެއް ހުށަހަޅައިދެނީ - ފޮޓޯ/ ރައީސް އޮފީސް
މި ރަސްމިއްޔާތުތަކުގައި ވާހަކަފުޅު ދައްކަވަމުން އެޑިޔުކޭޝަން މިނިސްޓަރު ޑރ. އިސްމާއިލް ޝަފީއު ވިދާޅުވީ، ފާއިތުވިތަނުގައި ސެކެންޑަރީ ގްރޭޑްތަކަށްވުރެ ޕްރައިމަރީ ގްރޭޑްތަކަށް ނިސްބަތުން ފައިސާ ހަރަދުކުރެވޭ މިންވަރުވެސް މަދުކަމަށާއި، ޒަމާނުއްސުރެން ޕްރައިމަރީ ގްރޭޑަށް ދެވިފައި އޮތް އަހަމިއްޔަތުކަންވެސް ކުޑަކަމަށެވެ.
ނަމަވެސް އޭލެވެލްއާއި އޯލެވެލްއިން ރަނގަޅު ނަތީޖާ ހާސިލްކުރެވޭނީ ޕްރައިމަރީ ގްރޭޑުތަކުގެ ނަތީޖާ ރަނގަޅުކުރެވިގެންކަން ފާހަގަކުރައްވާ މިނިސްޓަރު ވަނީ އެކަމަށް ހާއްސަ އަހަމިއްޔަތުކަމެއް ދެއްވާނެކަމުގެ ޔަފީންކަން އަރުވާފަ އެވެ.
ގައުމު އާރާސްތު ކުރެވޭނީ ތައުލީމީ ފެންވަރު ރަނގަޅުކޮށްގެންކަން ކަމަށާއި އެކަން ހާސިލްކުރަން އެންމެން އެކުގައި މަސައްކަތްކުރަން ޖެހޭކަން މިނިސްޓަރު ފާހަގަކުރެއްވި އެވެ.
