ގުތެރޭޝް މިފަދައިން ވިދާޅުވެފައިވާއިރު އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އާއި އޭނާގެ ދިފާއީ ވަޒީރު ޔޯފް ގަލަންޓް ހައްޔަރު ކުރުމުގެ އަމުރު ނެރުމުގެ ކަންތައް އަވަސްކުރުމަށް ބައިނަލްއަގްވާމީ ޖިނާއީ ކޯޓު (އައިސީސީ) ގެ ޕްރޮސެކިއުޓަރު ކަރީމް އަހްމަދު ހާން އެ ކޯޓުގެ ފަނޑިޔާރުންގެ ކިބައިން މިފަހުން ވަނީ އެދިވަޑައިގެންފަ އެވެ.
މިއީ ބައިނަލްއަގްވާމީ ޖިނާއީ ކޯޓުގެ ޕްރޮސެކިއުޓަރަކު މިހާ ފާޅުކަންބޮޑު ގޮތެއްގައި އެމެރިކާއާއި ޔޫރަޕްގެ މައްޗަށް މިފަދަ ބޮޑު ޖިނާއީ ތުހުމަތެއް ކުރެއްވި ފުރަތަމަ ފަހަރެވެ.
ގުތެރޭޝް ވިދާޅުވީ ފަލަސްތީނުގެ ގާޒާގެ މުސްލިމުން ޝަހީދުކޮށް ނެތިކޮށްލަން ޔަހޫދީ ފައުޖުން ހިންގަމުންދާ ލާއިންސާނީ އުދުވާނުގެ ތެރެއިން އދގެ މުވައްޒަފުންނާއި އެހީދޭ ބައިނަލްއަގުވާމީ ޖަމުއިއްޔާތަކުގެ މުވައްޒަފުން ޝަހީދު ކުރަމުންދާއިރު, ޔަހޫދީ ފައުޖު ޖަވާބުދާރީ ކުރުވޭނެ ގޮތެއް ނެތުމަކީ ބަލައިގަނަންނަން ދަތި ކަމެއް ކަމަށެވެ.
އިސްރާއީލުން ކޮންމެ ދުވަހަކު ގާޒާގެ އާންމުންގެ އެތަށް ބަޔަކާ ދެކޮޅަށް އެތަށް ގަތުލުއާންމެއް ހިންގަ އެވެ. ކޮންމެ ދުވަހަކު ވެސް ގާޒާގެ 60 ނުވަތަ 70 ވަރަކަށް އާންމުން އެއްވެސް ރަހުމެއްނެތި ޝަހީދުކޮށްލަ އެވެ. ގާޒާގެ ހެލްތު މިނިސްޓްރީން ހާމަކޮށްފައިވާ ގޮތުގައި، ވެއްޓިފައިވާ އިމާރާތްތަކުގެ ދަށުގައި ވަރަށް ގިނަ ބަޔަކު ތިބުމުން، ޝަހީދުވެފައިވާ މީހުންގެ އަދަދު މިއަށް ވުރެ ވެސް އިތުރުވާނެ ކަމަށް ބެލެވެ އެވެ.
އިސްރާއީލުގެ މި ގަތުލުއާންމުތަކަށް ވާގިވެރިވަނީ އެމެރިކާއާއި ޔޫރަޕްގެ ގައުމުތަކުންނެވެ. މި ގަތުލުއާންމުތައް ހިންގުމަށް ބޭނުންވާ ހަތިޔާރާއި ވަސީލަތްތަކާއި ހިމާޔަތް ވެސް އިސްރާއީލުގެ އިސްވެރިންނަށް ފާޅުގައި ދެނީ އެމެރިކާއާއި ޔޫރަޕްގެ ގައުމުތަކުންނެވެ.
ފަލަސްތީނުގެ ބިންތަކަށް ވެރިވެގަނެ، އެ މީހުންގެ މައްޗަށް ޔަހޫދީން ހިންގަމުންދާ އިސްތިއުމާރީ ވެރިކަމަކީ ގައިރު ގާނޫނީ އަމަލެއްގެ ގޮތުގައި ޖުލައި މަހު އދގެ އެންމެ މަތީ ކޯޓު، އިންޓަރނޭޝަލް ކޯޓް އޮފް ޖަސްޓިސް (އައިސީޖޭ)ން ވަނީ ކަނޑައަޅާފަ އެވެ. އަދި، ފަލަސްތީނުގެ ބިންތަކުން ފޭބުމަށް ޔަހޫދީންގެ މައްޗަށް އަމުރު ކޮށްފަ އެވެ. ކުރިއަށް އޮތް އދގެ އާންމު މަޖިލީހުގައި އެ ކަމާ މެދު ވޯޓަށް އަހާނެ ކަމަށް ބެލެވެ އެވެ.
އައިސީސީގެ އެއްވެސް ނިންމުމަކަށް އިޒްރޭލުން ތަބާނުވާނެ ކަމަށް ނަތަންޔާހޫ މީގެކުރިން ވެސް ވަނީ ވިދާޅުވެފަ އެވެ.
މިދިޔަ އަހަރުގެ އޮކްޓޫބަރު 7ގައި ގާޒާގެ މުސްލިމުންނާ ދެކޮޅަށް ޔަހޫދީ ފައުޖުން ފެށި ލާއިންސާނީ އުދުވާނުގައި ޝަހީދު ކޮށްލާފައިވާ މީހުންގެ އަދަދު ވަނީ 41184އަށް އުފުލިފަ އެވެ. އޭގެ ތެރޭގައި 16000އަށްވުރެ ގިނަ އަދަދަކަށް މައުސޫމު ކުޑަކުދިން ހިމެނެ އެވެ.
އިސްރާއީލުގެ އިސްތިއުމާރީ ސިފައިންގެ ހަމަލާތަކުގައި ގެދޮރާއި ހޮސްޕިޓަލްތަކާއި ސްކޫލްތަކާއި އެހެނިހެން މަދަނީ އިމާރާތްތައް ވެސް ވަނީ ސުންނާފަތި ކޮށްލައިފަ އެވެ. ހަނގުރާމައިގެ ސަބަބުން ފެނާއި ކާނާ އަދި ބޭސް ފަރުވާ ފަދަ ޒަރޫރީ ބޭނުންތަކަށް ބޭނުންކުރާނެ ތަކެތި ލިބުމުންވެސް ގާޒާގެ ރައްޔިތުން ވަނީ މަހުރޫމުވެފަ އެވެ. އަދި ގާޒާއަށް ކެނޑިނޭޅި ދެމުންގެންދާ ހަމަލާތަކާއެކު، އދ.ގެ އެހީފޯރުކޮށްދިނުމުގެ މަސައްކަތް ވެސް ވަނީ ގާތްގަޑަކަށް ހުއްޓިފަ އެވެ.
