ރާއްޖޭގެ ބޭރު ދަރަނީގެ މައްސަލަ ބޮޑުވެ، ޑޮލަރު ތާށިވެފައިވާއިރު ޑޮލަރަށް ބަރޯސާވާ މިންވަރު ދަށްކޮށް، އާމްދަނީ އިތުރުކުރަން ސަރުކާރުން އަންނަނީ ފިޔަވަޅުތަކެއް އަޅަމުންނެވެ. އެގޮތުން، ޑޮލަރުން އާމްދަނީ ލިބޭ ވިޔަފާރިތަކުން ބައެއް ޓެކްސްތައް ވެސް ޑޮލަރުން ދައްކަންޖެހޭ ގޮތަށް ދާދި ފަހުން ވަނީ ބަދަލު ގެނެސްފައެވެ.
ދައުލަތުގެ މީޑިއާއަށް ވާހަކަދައްކަވަމުން ސައީދު ވިދާޅުވީ ބުރާސްފަތި ދުވަހު ސޮއިކުރެވުނު އެއްބަސްވުމުގެ ސަބަބުން ދެގައުމުގެ ފައިސާއިން ވިޔަފާރިކުރެވޭނެ، އިތުރު ކަރަންސިއަކާ ނުލާ ޗައިނާގެ ޔޫއަން "ސީއެންވައި" އަދި ދިވެހި ރުފިޔާ "އެމްވީއާރު" ބޭނުންކޮށްގެން ވިޔަފާރި ކުރެވޭނެ އިންތިޒާމް ހަމަޖެހިގެން ގޮސްފައިވާކަމަށެވެ. އަދި މި އެއްބަސްވުމާއެކު ޕީޕަލްސް ބޭންކް އޮފް ޗައިނާއާއި މޯލްޑިވްސް މަނިޓަރީ އޮތޯރިޓީ އާ ދެމެދުގައި އިންތިޒާމްތައް ހަމަޖެހިގެންދާނެކަމަށް ސައީދު ވިދާޅުވިއެވެ.
އޭގެއިތުރުން އެކްސް މެދުވެރިކޮށް ކުރެއްވި ޕޯސްޓެއްގައި ފިޝަރީޒް މިނިސްޓަރު ޝިޔާމް ވިދާޅުވީ އެ އެއްބަސްވުމުގެ ސަބަބުން ޑޮލަރަށް ބަރޯސާވާ މިންވަރު މަދުވެ ޗައިނާއާއެކު ވިޔަފާރި ކުރާ ގިނަ ވިޔަފާރިތަކަށް، ޕްރޮސެސްތައް ސްޓްރީމްލައިން ކުރެވޭ ގޮތަށް ލޯކަލް ކަރަންސީން ވިޔަފާރީގެ މުއާމަލާތްތައް ފަސޭހައިން ކުރެވިގެން ދާނެކަމަަށެވެ.
ޑޮލަރުގެ ދަތިކަން ދިމާވެ، ސަރުކާރުން އަންނަނީ ޑޮލަރަށް ބަރޯސާވާ މިންވަރު ކުޑަކުރުމުގެ ގޮތުން އަވައްޓެރި، ރަހުމަތްތެރި ގައުމުތަކާ އެކު މި ފަދަ އެއްބަސްވުންތައް ހަދަން މަސައްކަތްކުރަމުންނެވެ.
