އޭނާގެ ހިޔާލުތަކަށް ތައުރީފުއޮހެމުން ދިޔައިރު، ގިނަބަޔަކަށް ހީވީ އެމީހުންގެ ހިތުގައި ގިނަ ދުވަސްތަކެއްވަންދެން ނުދެއްކިއޮތް ވާހަކަތައް އޭނާ ބަންޑުންކޮށްލިހެންނެވެ.
އޭނާ ފާހަގަކުރި ގޮތުގައި، މާލެއަށް ހިޖުރަކުރާ ރާއްޖެތެރޭ މީހުންނަށް ގިނަ ދަތިތަކާ ކުރިމަތިލާން ޖެހެއެވެ. ނަމަވެސް އެމީހުންނަކީ މާލޭގެ ބައެއްކަމުގައި ބަލައިނުގަނެވެއެވެ.
އަމިއްލަ ރަށާ ގުޅުން ކެނޑި، މާލެއާވެސް ގުޅުމެއް ނެތި، ދެ ތަނުގެ ދޭތެރޭގައި ޖެހިފައިވާ ހާލު އޭނާ ސިފަކުރިއެވެ.
މި ވާހަކަތަކުން ހާމަވަނީ މާލެއަށް ހިޖުރަކުރާ ރާއްޖެތެރޭ މީހުންނަށް ދިމާވާ އިޖްތިމާއީ އަދި އިގްތިސާދީ ގޮންޖެހުންތަކެވެ. ބޯހިޔާވަހިކަމުގެ ދަތިކަމާއި، އަމިއްލަވަންތަކަން ގެއްލުމާއި، މުޖުތަމައުގައި ބަލައިނުގަތުން ފަދަ މައްސަލަތަކަކީ މި ބަޔަކަށް ދިމާވާ މައިގަނޑު ދަތިތަކެވެ.
އަދި މާލެއަށް އައުމަށްފަހު އަމިއްލަ ރަށާ ގުޅުން ކެނޑި، ރަށުގެ މަގުތައްވެސް ހަނދާން ނެތިގެންދާކަން އޭނާ ފާހަގަކުރިއެވެ. "މިފަހަރު ޗުއްޓީގަ ރަށަށް ދިޔައިން... ރަށު ސްކޫލަ ހުރެފައި ގެއަށް ދާ މަގެއް މަށަކަށް ނޭންގުނު" އޭނާ ބުންޏެވެ.
މި ހާލަތު ހައްލުކުރުމަށް ސަރުކާރުންނާއި މުޖުތަމައުން އަޅަންޖެހޭ ފިޔަވަޅުތަކެއް ހުރިކަން މި ޒުވާނާގެ ވާހަކަތަކުން ހާމަވެއެވެ. "ރާއްޖެތެރެއިން" މާލެއަށް ހިޖުރަކުރާ މީހުންނަށް އެކަށީގެންވާ ބޯހިޔާވަހިކަން ފޯރުކޮށްދިނުމާއި، އެ މީހުންގެ ހައްގުތައް ރައްކާތެރިކުރުމާއި، މުޖުތަމަޢުގައި ބަލައިގަތުން އިތުރުކުރުމަކީ މުހިންމު ކަންކަމެވެ.
މި މައްސަލައަށް ހައްއްލެއް ހޯދުމަށް ކަމާބެހޭ ފަރާތްތަކުން މަސައްކަތްކުރަން ޖެހިފައިވާކަން މި ދިވެހި ޒުވާނާގެ ވާހަކަތަކުން، އަދި އެނާގެ ޕޯސްޓަށް ސަޕޯޓުކޮށް އެތައް ބަޔަކުކޮށްފައިވާ ކޮމެންޓުތަކުން ހާމަވެއެވެ.
"ރާއްޖެތެރެއިން" މާލެއަށް ހިޖުރަކުރާ މީހުންގެ ދިރިއުޅުމުގެ ފެންވަރު ރަނގަޅުކޮށް، އެ މީހުންނަށް ހަމަހަމަ ފުރުސަތުތަކެއް ލިބޭނެ މާގައުލެއް ގާއިމުކުރުމަކީ މުޅި މުޖުތަމައުގެ ޒިންމާއެކެވެ.
