ރާއްޖެއަށް މަސްތުވާތަކެތި އެތެރެކުރި ކަމުގެ މައްސަލާގައި ހައްޔަރުކުރީ ނޭޕާލް ރައްޔިތެއް ކަމަށްވާ އުމުރުން 39 އަހަރުގެ ރަޖްބަންށި ޗަތްރަ ބަހާދުރަ، އާއި ޕާކިސްތާނުގެ ރައްޔިތެއް ކަމަށްވާ އުމުރުން 24 އަހަރުގެ ޒަހިދު މުހައްމަދުއެވެ.
ރާއްޖެއަށް މަސްތުވާ ތަކެތި އެތެރެކުރި މި ދެމީހުން 20 ދުވަހަށް ބަންދުކުރަން ކްރިމިނަލް ކޯޓުން އަމުރުނެރެފައިވާއިރު، މި އަމުރުގައިވާ ގޮތުން ޕާކިސްތާނަށް ނިސްބަތްވާ މީހާ ވަނީ މަސްތުވާތަކެތީގެ 60 ބުލެޓު ރާއްޖެ އެތެރެކޮށްފައެވެ.
ނަމަވެސް އެއީ މަސްތުވާތަކެތިކަން ނޭނގޭ ކަމަށް ތަހުގީގުގައި އޭނާ ވަނީ ބުނެފައެވެ. އަދި އެއީ ބަޔަކު ބިރު ދައްކައިގެން އޭނާ ލައްވައި ކުރުވި ކަމެއް ކަމަށް އޭނާ ބުނެފައިވާ ކަމަށް ކޯޓު އަމުރުގައިވެއެވެ.
އޭނާ މިކަން ކޮށްފައި ވަނީ އެހެން މީހަކާ ބައިވެރިވެގެން ކަމަށް ތުހުމަތު ކޮށްފައިވާއިރު، މި މައްސަލައިގައި ހިމެނޭ ނޭޕާލް މީހާ ވަނީ، މައްސަލައިގައި ތުހުމަތުކުރެވޭ މީހަކު ފޮރުވަން ދިން މަސްތުވާތަކެތި ކޮބައިތޯ ސުވާލުކުރުމުން ދަބަހެއް ފުލުހުންނަށް ދައްކައިފައެވެ.
މި ދެމީހުންގެ މި މައްސަލައިގެ ތަހުގީގު ނިންމައި މިހާރު މި މައްސަލަ ޕްރޮސެކިއުޓާ ޖެނެރަލްގެ އޮފީހަށް ހުށަހަޅައި، އެ އޮފީހުން ބަލައިގަނެފައިވާއިރު، ޝަރީއަތް ނިމެންދެން ބަންދު ކުރުމަށް އެ އޮފީހުން ވަނީ އެދިފައެވެ.
