ދުނިޔޭގެ އެންމެ ބޮޑު ބޭންކުތަކުގެ ތެރޭގައި ހިމެނޭ ޗައިނާގެ އިންޑަސްޓްރިއަލް އެންޑް ކޮމާޝަލް ބޭންކް (އައިސީބީސީ) ގެ ގޮތްޕެއް ރާއްޖޭގައި ހުޅުވުމަށް މަސައްކަތް ފަށައިފިކަމަށް އިގުތިސާދީ މިނިސްޓަރު މުހައްމަދު ސައީދު ހާމަކުރައްވައިފި އެވެ.
މިނިސްޓަރު ސައީދު މިކަން ހާމަކުރެއްވީ ދިވެހި ސަރުކާރާއި ޗައިނާގެ ޕީޕަލްސް ބޭންކް އޮފް ޗައިނާ (ޕީބީއޯސީ) އާ ދެމެދު ވެވުނު އެއްބަސްވުމަކާ ގުޅިގެން ދައުލަތުގެ މީޑިއާ މެދުވެރިކުރައްވައި ރައްޔިތުންނާއި ވާހަކަދައްކަވަމުންނެވެ. މި އެއްބަސްވުމުގެ ދަށުން ދެ ޤައުމުގެ ފައިސާއިން ކަރަންޓް އެކައުންޓް މުޢާމަލާތްތައް ހިންގުމަށް މަގުފަހިވެގެންދާނެ އެވެ.
މިނިސްޓަރު ސައީދު ވިދާޅުވީ އައިސީބީސީގެ ގޮފި ރާއްޖޭގައި ހުޅުވުމާ ގުޅޭ މަޝްވަރާތައް މިހާރު ކުރިއަށްދާ ކަމަށެވެ. މީގެ އިތުރުން، ޗައިނާއާއެކު ކުރިން ވެފައިވާ މިނިވަން ވިޔަފާރީގެ އެއްބަސްވުމަށް އަމަލުކުރަން ފެށުމަށްވެސް ދެ ގައުމުން އެއްބަސްވާ ވަގުތެއްގައި ފެށޭނެ ކަމަށް އޭނާ ވިދާޅުވި އެވެ.
މި އެއްބަސްވުންތަކާއެކު ޗައިނާއާއި ރާއްޖެއާ ދެމެދު ހިނގާ ވިޔަފާރީގެ މުޢާމަލާތްތައް އިތުރަށް ފުޅާވެ، އަހަރަކު 1 ބިލިއަން ޑޮލަރަށް އަރާނެ ކަމަށް ސަރުކާރުން ލަފާކުރެ އެވެ. މިހާރުވެސް ޗައިނާއިން ރާއްޖެއަށް މުދާ އެތެރެކުރުމަށް އަހަރަކު 700 މިލިއަނެއްހާ ޑޮލަރު ހޭދަކުރެވެ އެވެ.
