މިނިސްޓަރު އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް މުޙައްމަދު ސައީދު އައްޑޫގެ ކުދި އަދި މެދު ފަންތީގެ ވިޔަފާރިވެރިންނާ ބައްދަލުކުރައްވައި، އެ ސަރަޙައްދުގެ ވިޔަފާރިތަކަށް ހުރި ގޮންޖެހުންތަކާއި ދަތިތަކާ ބެހޭގޮތުން މަޝްވަރާކުރެއްވިއެވެ.
ބައްދަލުވުމުގައި ވަޒީރު ވިދާޅުވީ ވިޔަފާރިވެރިންނަށް ހުރި ދަތިތައް ހައްލުކޮށްދެއްވާނެ ކަމަށް ރައީސުލްޖުމްހޫރިއްޔާ ވެފައިވާ ވަޢުދާ އެއްގޮތަށް ސަރުކާރުން މަސައްކަތްކުރައްވާނެ ކަމަށެވެ. އަދި އެ ސަރަޙައްދުގައި ކުރިއަށް ގެންދަވަން ރާއްވަވާފައިވާ މަޝްރޫޢުތައް ވީހާވެސް އަވަހަކަށް ފައްޓަވައި، އޭގެ މަންފާ ރައްޔިތުންނަށް ލިބޭނެ ގޮތް ހައްދަވައިދެއްވުމަށް ސަރުކާރުން އިސްކަންދެއްވާނެ ކަމަށް ވެސް ވިދާޅުވިއެވެ.
މި ބައްދަލުވުމުގައި އިޤްތިޞާދީ ވުޒާރާގެ އިސް ބޭފުޅުންނާއި، ބިޒްނަސް ސެންޓަރ ކޯޕަރޭޝަންގެ އިސްވެރިންނާއި، ރައްޔިތުންގެ މަޖިލީހުގެ ފޭދޫ ދެކުނު ދާއިރާގެ މެންބަރު އިބްރާހީމް ދީދީ ބައިވެރިވެވަޑައިގެންނެވިއެވެ.
