އިޒްރޭލުގެ އުމުރުން 49 އަހަރުގެ ގަލް ހައިމޯވިޗް ނަމަކަށް ކިޔާ މީހަކު އެމެރިކާގެ ގާނޫނާ ހިލާފަށް މަތިންދާބޯޓުގެ ބައިތަކާއި އެވިއޯނިކްސް ރަޝިޔާއަށް ފޮނުވުމުގެ ކުށަށް އިއުތިރާފުވަނީވެފައެވެ.
މި މައްސަލައިގައި އޭނާ ރާއްޖެ މެދުވެރިކޮށް ރަޝިޔާއަށް މުދާ ފޮނުވާފައިވާކަން ހާމަވެފައިވެއެވެ.
ކޯޓު ލިޔެކިޔުންތަކުން ދައްކާގޮތުގައި، ހައިމޯވިޗް ވަނީ 2022 ގެ މާރިޗު މަހުން ފެށިގެން 2023 ގެ މެއި މަހާ ހަމައަށް، އެމެރިކާއިން މަތިންދާބޯޓުގެ ބައިތަކާއި އެވިއޯނިކްސް ރަޝިޔާގެ ކަސްޓަމަރުންނަށް ފޯރުކޮށްދިނުމަށް ތިންވަނަ ފަރާތްތަކަށް ފޮނުވާފައެވެ. މީގެ ތެރޭގައި މިސައިލް ޓެކްނޮލޮޖީއާ ގުޅުންހުރި ބައިތައް ވެސް ހިމެނެއެވެ.
މިސާލެއްގެ ގޮތުން، 2022 ގެ އޯގަސްޓު މަހު، ހައިމޯވިޗް ވަނީ ސައިބީރިއާ އެއަރލައިންސް (އެސް7 އެއަރލައިންސް) އަށް މަތިންދާބޯޓެއްގެ ބައެއް ރަޝިޔާއަށް ފޯރުކޮށްދިނުމަށް، އެމެރިކާގެ ސަޕްލަޔަރަށް އޮޅުވާލައި، އެ ބައި ފޮނުވަނީ ރާއްޖެއަށް ކަމަށް ބުނެ ދޮގު މަޢުލޫމާތު ދީފައެވެ. ނަމަވެސް އޭނާއަށް އެނގިހުރެ އެ ބައި ފޮނުވީ ރަޝިޔާއަށެވެ.
ހައިމޯވިޗް ވަނީ 2022 ގެ އޭޕްރިލް މަހުން 2023 ގެ އޭޕްރިލް މަހާ ހަމައަށް، ރާއްޖެއާއި ޔޫއޭއީގެ ކުންފުނިތަކަށް 160 އަށްވުރެ ގިނަ ޝިޕްމަންޓް ފޮނުވާފައިވާ ކަމަށްވެސް އެއްބަސްވެފައެވެ. މި ކުންފުނިތަކުން މި މުދާ ރަޝިޔާއަށް ފޮނުވާފައިވެއެވެ.
މި މައްސަލައިގައި ހައިމޯވިޗްގެ ހުކުމް އިއްވުމަށް ހަމަޖެހިފައިވަނީ ނޮވެމްބަރު 22 ވަނަ ދުވަހުއެވެ.
