ރާއްޖޭގެ ސީޒަން ފެށޭނެ އިރެއް އަދި ނޭނގުނު ނަމަވެސް، އޭއެފްސީން އަލަށް ފަށާ އޭއެފްސީ ޗެލެންޖް ލީގުގައި ވާދަކުރާ މާޒިޔާއަށް ގެނައީ އުމުރުން 28 އަހަރުގެ ޑިފެންޑަރެކެވެ.
މާރިއޯ ޒެބީކް ކިޔާ މި ކުޅުންތެރިޔާ އެންމެ ފަހުން ކުޅުނީ ވިއެޓްނާމްގައެވެ. އޭނާ ކުރިން ޔޫރަޕުގައިވެސް ކުޅުނެވެ.
ރާއްޖޭގެ ފުޓްބޯޅަ ސީޒަން ފަށާނެ ތާރީހެއް އަދި ނޭގެއެވެ. އެހެން އެކަން އޮތް ނަމަވެސް، އޮކްޓޫބަރު މަހު ފަހުކޮޅު ފެށޭ އޭއެފްސީގެ ޗެލެންޖް ލީގުގައި މާޒިޔާއިން ކުޅެން ޖެހެއެވެ. އޮކްޓޫބަރު 26 ގައި ފަށާ އޭއެފްސީ ޗެލެންޖް ލީގުގައި މާޒިޔާ ހިމެނެނީ ވަރުގަދަ ގްރޫޕެއްގަ އެވެ.
މާޒިޔާގެ ގްރޫޕްގައި ހިމެނޭ ކުވެއިތުގެ އަލް އަރަބި އަކީ އެ ގައުމުގެ ޕްރިމިއާ ލީގުގެ ރަނަރަޕް އެވެ. އަކްރަޑަގް އަކީ ތުރުކުމެނިސްތާންގެ ލީގާއި ކަޕް ޗެމްޕިއަންކަން އެންމެ ފަހުން ހޯދި ޓީމެވެ. އަދި ޕްލޭއޮފް ބުރުން އައި ކިރްގިސްތާންގެ އަބްދީޝް އާޓާ އަކީ އެ ގައުމުގެ އެންމެ ފަހުން ދެ ފަހަރު ވެސް ލީގު ޗެމްޕިއަން ހޯދި ޓީމެވެ.
އޭއެފްސީ ޗެލެންޖް ލީގަކީ އޭއެފްސީގެ ތިން ވަނަ ފަންތީ ކްލަބް ފުޓްބޯޅަ މުބާރާތެވެ. ޗެލެންޖް ލީގުގެ ގްރޫޕް ސްޓޭޖުގެ މެޗުތައް ޗެލެންޖް ލީގުގެ ގްރޫޕް ސްޓޭޖުގެ މެޗުތައް އޮންނާނީ، އޮކްޓޫބަރު 26، އޮކްޓޫބަރު 29 އަދި ނޮވެމްބަރު 1 ގަ އެވެ. މާޒިޔާ ހިމެނޭ ގްރޫޕްގެ މެޗުތައް ސެންޓްރަލައިޒްކޮށް ކުޅޭނީ ކުވެއިތުގަ އެވެ.
