ތޫނު ހަތިޔާރާއެކު މީހުންނާ މާރާމާރީ ހިންގުމުގެ ރެކޯޑް އޮންނަ މި އަންހެން މީހާއަކީ ތ. ތިމަރަފުށީ ސަލްވާ، ފާތިމަތު ޝަހުދާއެވެ. އޭނާ މި ފަހަރުވެސް ހައްޔަރު ކުރީ ކަޓަރަކާއެކު އެވެ. އޭނާ ހައްޔަރުކޮށް 15 ދުވަހަށްވަނީ ބަންދު ޖަހާފަ އެވެ.
މި އަންހެން މީހާ މިދިޔަ އަހަރު ފަހުކޮޅު މާލޭގެ ފިހާރައެއްގެ ތެރެއަށް ވަދެ، ސޭޓަށް ވަޅިން ހަމަލާދިން މައްސަލާގައިވެސް ހައްޔަރު ކުރި އެވެ. އޭގެ ފަހުން ފޭރުމުގެ އެހެން މައްސަލައެއްގައޮ އޭނާ ހައްޔަރު ކުރިކަން ރެކޯޑްތަކުން ދައްކަ އެވެ.
މިދިޔަ އަހަރު ފަހުކޮޅު މި އަންހެން މީހާ ހައްޔަރުކޮށްފައިވަނީ މާފަންނު މަޖީދީ މަގުގައި ހުންނަ ފޯނު ވިއްކާ ފިހާރައެއް ކަމަށްވާ ޑްރީމްސް މޮބައިލްސް ތެރޭގައި ވަޅިން ހަމަލާދީ ފޭރުނު މައްސަލައިގައެވެ. އެ ހާދިސާގެ މަންޒަރު ފެންނަ އެ ފިހާރައިގެ ސީސީޓީވީ ފުޓޭޖު ސޯޝަލް މީޑިއާގައި ދައުރުވެފައިވާއިރު ފުޓޭޖުން ފެންނަ ގޮތުގައި، ފިހާރައަށް ވަދެ އެ އަންހެން މީހާ ފޯނެއް ދައްކަން ސޭޓު ގާތުގައި އެދެ އެވެ.
ފޯނު ދެއްކި ފަހުން ދެ މީހުންގެ މެދުގައި ޒުވާބެއް ހިނގަ އެވެ. އޭގެ އިރުކޮޅެއް ފަހުން އެ އަންހެން މީހާ އޭނާގެ ހެދުމުގެ ތެރޭގައި އޮތް ވަޅިއެއް ނަގައި ސޭޓުގެ ކަރުގައި އަޅައިފައި ފިހާރައިން ނުކުންނަ ދުއްވައިގަނެ އެވެ. އެ ފަހަރު ވަޅި ހަމަލާދިނުމުގެ ސަބަބުން ޒަހަމްވި ބިދޭސީ މީހާއަށް އޭޑީކޭ ހޮސްޕިޓަލުގައި ފަރުވާ ދީފަ އެވެ.
