މާލޭގައި ހޮނިހިރު ދުވަހު ފެށި ސެންޓްރަލް އޭޝިއަން ވޮލީބޯލް އެސޯސިއޭޝަން ގެ ވިމެންސް ވޮލީބޯލް ކްލަބް ޗެމްޕިއަންޝިޕްގައި ރާއްޖޭގެ ޗެމްޕިއަން، ކްލަބް ވެމްކޯ އަވައްޓެރި ސްރީ ލަންކާގެ އެއާފޯސް ޓީމު އަތުން މޮޅުވީ ތިން ސެޓު އެއް ސެޓުންނެވެ. ސްރީ ލަންކާ އެއާފޯސް އަތުން ފަހަތުން އަރައި ވެމްކޯ މޮޅުވި މެޗުގެ ސެޓުތައް ދިޔައީ، 25-20، 23-25، 15-25 އަދި 19-25 އިންނެވެ.
ކާވާގެ ވިމެންސް ވޮލީބޯލް ކްލަބް ޗެމްޕިއަންޝިޕްގައި ހަ ޓީމުން ވާދަކުރެއެވެ. އެއީ ވެމްކޯ އާއި އެއާފޯސްގެ އިތުރުން ރާއްޖޭގެ ޕޮލިސް ކްލަބާއި ނޭޕާލްގެ ޕޮލިސް ކްލަބާއި އުޒްބެކިސްތާންގެ ހުމޯ ކްލަބް އަދި ތަޖިކިސްތާންގެ ވީކޭ ޑިއާމެޑް އެވެ.
މުބާރާތުގެ ފޯމެޓް ރޭވިފައިވަނީ، ކޮންމެ ޓީމެއް ކޮންމެ ޓީމަކާ ކުޅުމަށް ފަހު، އެއް ވަނަ އާއި ދެ ވަނައިގެ މެދުގައި، ފައިނަލް ކުޅުމަށް ފަހު، ތިން ވަނަ އާއި ހަތަރު ވަނައިގެ މެދުގައި ބްރޯންޒް މެޑަލް މެޗެއް ކުޅެ، ފަސް ވަނަ އާއި ހަ ވަނައިގެ މެދުގައި ރޭންކިން މެޗެއް ކުޅޭ ގޮތަށެވެ.
މިއީ، އަންހެން ވޮލީގައި ވެމްކޯ ވާދަކުރާ ބައިނަލްއަގުވާމީ ދެ ވަނަ މުބާރާތެވެ. މީގެ ކުރިން، 2019 ވަނަ އަހަރު ލަންކާގައި ބޭއްވި، 33 ވަނަ ތަރުނަސެވާ ރުޕަވަހިނީ ވޮލީބޯޅަ މުބާރާތުގެ އަންހެން ބައިގެ ތިން ވަނަ ވެމްކޯ ޓީމުން ހޯދި އެވެ. އެ ފަހަރު އެ ޓީމަށް ކޯޗުކޮށްދިން، އަހުމަދު އަދީލް (ބޭބެ) އަކީ، މި ފަހަރު ވެސް ވެމްކޯގެ ކޯޗެވެ.
މިއީ، ރާއްޖޭގައި އަންހެން ކުޅުންތެރިންނަށް ހާއްސަކޮށްގެން ކްލަބް ލެވަލްގެ ވޮލީ މުބާރާތެއް ކުޅޭ ފުރަތަމަ ފަހަރެވެ.
