ވ. އާރަށް މައްސަލަ ނިންމާ ކްރިމިނަލްކޯޓުން ވަނީ ރިޝްވަތާ މަނީ ލޯންޑަރިން ކުށްް ސާބިތުވާކަމަށް ކަނޑައަޅާ ރައީސް ޔާމީންގެ މައްޗަށް 11 އަހަރުގެ ޖަލު ހުކުމެއް އިއްވާފައެވެ. 2021 ވަނަ އަހަރު ދަށު ކޯޓުން އިއްވި ހުކުމް ހައުކޯޓުން ބާތިލުކޮށް، އެ މައްސަލަ އަލުން ބަލަން ވަނީ ކްރިމިނަލްކޯޓަށް އަންގާފައެވެ.
ހައި ކޯޓުން އެ މައްސަލާގައި ކުރި ހުކުމުގެ ބައެއް ދައުލަތުން ސުޕްރީމް ކޯޓުގައި އިސްތިއުނާފުކޮށްފައި ވެސް ވެއެވެ. އެއީ ޔާމީންގެ މައްޗަށް އުފުލާފައިވާ ހިޔާނާތުގެ ދައުވާތައް ސާބިތު ކުރުމަށް ކްރިމިނަލް ކޯޓުގައި ދައުލަތުން ހުށަހެޅި އާ ހެކިތައް އެއް ފަރާތް ކުރުމަށް ހައި ކޯޓުން ނިންމި ބައެވެ.
ދަށު ކޯޓްގެ މައްސަލަައިގެ މިއަދުގެ އަޑުއެހުމުގައި ރާއީސް ޔާމީންގެ ގާނޫނީ ޓީމުން ވަނީ މި މައްސަލައާ ގުޅުން ހުރި މައްސަލައެއް ސުޕްރީމްކޯޓުގައި ކުރިޔަށްދާތީ އެ މައްސަލަ ނިމުމުން ނޫނީ މި މައްސަލަ ކުރިޔަށް ނުގެންދެވޭނެކަމަށް ކަނޑައަޅާދިނުމަށް އެދިފައެވެ.
ރައީސް ޔާމީންގެ ދިފާއީ ޓީމުން ބުނީ ސުޕްރީމް ކޯޓުގައި އެ މައްސަލަ އޮއްވާ ދަށުކޯޓުން އެބައިތައް ގެންދިޔުމުން އެ މައްސަލާގައި ފުށުއަރާކަމަށެވެ.
މި ހުށައެއުމާއި ގުޅިގެން ދައުލަތުން ޖަވާބު ދާރީވުމަށް ދިން ފުރުސަތުގައި ވާހަކަ ދައްކަމުން ދައުލަތުގެ ވަކީލް ވިދާޅުވީ ސުޕްރީމް ކޯޓުގައި އޮތް މައްސަލައިގެ ޔައުމިއްޔާއާ މި ހިނގަމުންދާ މައްސަލައާ ގުޅޭ ކަމަށެވެ. އެހެންކަމުން ސުޕްރީމް ކޯޓުގެ ނިންމުމާއެކު، މި މައްސަލައަށް ބަދަލުތަކެއް އައުން އެކަށީގެންވާކަމަށް ދައުލަތުގެ ވަކީލުން ވިދާޅުވިއެވެ.
ދެ ފަރާތުގެ ވާހަތަކަސް ފަހު މައްސަލަ ބައްލަވާ ކްރިމިނަލްކޯޓުގެ ގާޒީ ވިދާޅުވީ އެހެންކަމުން މައްސަލަ ކުރިޔަށް ގެންދާނީ ސުޕްރީމް ކޯޓުގައި އިސްތިއުނާފު ކޮށްފައިވާ މައްސަލައިގެ ގޮތެއް ނިމުމުންކަމަށެވެ.
އާރަށް މައްސަލާގައި ރައީސް ޔާމީންގެ މައްޗަށް 11 އަހަރުގެ ޖަލު ހުކުމެއް އިއްވީ ޑިސެމްބަރު 25، 2022 ގައެވެ. އޭގެ ފަހުން، ވެރިކަން ބަދަލުވެ މި އަހަރުގެ އޭޕްރީލް 18 ގައި ހައިކޯޓުން ވަނީ ދަށު ކޯޓުގެ ހުކުމް ބާތިލުކޮށް ޔާމީން މިނިވަންކޮށްފައެވެ.
