ދައުލަތުގެ މީޑިއާ މެދުވެރިކުރައްވައި ރައްޔިތުންނާ ވާހަކަ ދައްކަވަމުން ވަޖީހު ވިދާޅުވީ، މި ބޯޓު ޔާޑު ހާއްސަކުރެވިގެންދާނީ ފައިބަރުން ބޯޓު ބަނުމަށް ކަމަށެވެ. މީގެ އިތުރުން، ޕޯޓަށް ފަސޭހައިން ބޯޓުފަހަރު ގާތްކުރެވޭނެ ގޮތަށް ޖެޓީއެއް ހެދުމުގެ މަސައްކަތް ވެސް ކުރިއަށްދާ ކަމަށް އޭނާ ހާމަކުރެއްވިއެވެ.
ވަޖީހު އިތުރަށް ވިދާޅުވީ، ކުޅުދުއްފުށީ ޕޯޓަށް މިވީ 19 ވަރަކަށް އަހަރު ތެރޭގައި އެއްވެސް ތަރައްގީއެއް އައިސްފައި ނުވާ ކަމަށާއި، އެ ތަން ހިންގަމުން އައިސްފައިވަނީ ގެއްލުމުގައި ކަމަށެވެ. ނަމަވެސް މިހާރު އެމްޕީއެލްއިން އަންނަނީ އެ ޕޯޓަކީވެސް ފައިދާ ލިބޭނެ ތަނަކަށް ހެދުމަށް މަސައްކަތްތަކެއް ކުރަމުންނެވެ.
މި މަސައްކަތްތަކުގެ ތެރޭގައި، ކުޅުދުއްފުށްޓަށް ދާއިމީ ގޮތެއްގައި ޕެރިޝަބަލް މުދާ އެތެރެކުރެވޭނެ އިންތިޒާމު ހަމަޖެއްސުމަށް މަސައްކަތްކުރަމުންދާ ކަމަށްވެސް ވަޖީހު ފާހަގަކުރެއްވިއެވެ. އޭނާ ވިދާޅުވީ މި މަހުގެ ނިޔަލަށް ނުވަތަ އަންނަ މަހުގެ ކުރީކޮޅު އިންޑިއާއިން ދާއިމީ ގޮތެއްގައި އެފަދަ މުދާ ގެނެވޭނެ އިންތިޒާމު ހަމަޖެހިގެންދާނެ ކަމަށެވެ.
މި ހުރިހާ މަސައްކަތްތަކަކީ ވެސް ކުޅުދުއްފުށީ ސިޓީގެ ވިޔަފާރިވެރިންގެ މަޝްވަރާއާއެކު ކުރިއަށްގެންދާ ކަންކަން ކަމަށް ވަޖީހު އަންގަވައިދެއްވިއެވެ. މި ބަދަލުތަކާއެކު، އެ ސަރަހައްދުގެ ރައްޔިތުންނަށް އަގުހެޔޮކޮށް މުދާ ލިބި، ވިޔަފާރިވެރިންނަށް ކޮންމެ 10 ދުވަހަކުން ބޯޓުން މުދާ ގެނެވޭނެ ގޮތް ހަމަޖެހިގެންދާނެ ކަމަށް އޭނާ ވިދާޅުވިއެވެ.
