އައްބާސް މިއަދު މިހެން ވިދާޅުވީ، ޕީޖީ މަގާމަށް ކުރިމަތިލާފައިވާ ބޭފުޅުންނާއި ރައްޔިތުންގެ މަޖިލީހުގެ މާލިއްޔަތު ކޮމެޓީން ކުރިއަށް ގެންދިޔަ އިންޓަވިއުގައި ވާހަކަ ދައްކަވަމުންނެވެ. އޭނާ ވިދާޅުވީ މަސައްކަތް ކުރާނީ ރާއްޖޭގައި އޮތް ޖިނާއީ އަދުލުގެ ނިޒާމު އިސްލާހުކޮށް ހުރިހާ ސްޓޭކް ހޯލްޑަރުންނާގުޅިގެންކަމަށެވެ. އަދި ގިނައިން ދައުވާކުރުމަށްވުރެ ދައުލަތުގެ މުއައްސަސާތައް ގުޅިގެން ކުށް މަދުކުރެވޭނެ އުސޫލަކުން މަސައްކަތް ކުރައްވާނެކަމަށް ވެސް އޭނާ ވިދާޅުވިއެވެ.
މީގެ އިތުރުން އޭނާ މިއަދު ވަނީ ޖުޑީޝަރީގެ ދާއިރާގައި މަސައްކަތް ކުރެއްވިއިރުގެ ބައެއް ތަޖުރިބާތައްވެސް ވަނީ ހިއްސާކުރައްވާފައެވެ.
މިއަދު އިންޓަވިއުގައި އައްބާސް ވިދާޅުވީ، އޭނާގެ ހައިކޯޓުގެ ތަޖުރިބާގެ ތެރޭގައި ސިޔާސީ ބޮޑެތި މައްސަލަތައް ބެލުމާއި، ބޮޑެތި ކުށުގެ މައްސަލަތައް ބެލުމުގެ މަސައްކަތްވެސް ކުރައްވާފައިވާނެކަމަށެވެ.
އައްބާސް ވިދާޅުވީ ހައިކޯޓުގައި މަސައްކަތް ކުރެއްވިއިރުވެސް އެއްވެސް ބިރަކަށް ނުގުޑާ މަސައްކަތް ކުރެއްވި ކަމަށެވެ.
ޕީޖީގެ މަގާމަށް ކުރިމަތިލާން ހުޅުވާލި ފުރުސަތުގައި ޖުމްލަ 6 ބޭފުޅަކު އެ މަގާމަށް ކުރިމަތިލައްވާފައިވެއެވެ. އެ ބޭފުޅުންގެ ނަން ރައީސް އޮފީހުން މިދިޔަ ބުދަ ދުވަހު ރައްޔިތުންގެ މަޖިލީހަށް ފޮނުވި އިރު އޭގެ ތެރެއިން ރައީސުލްޖުމްހޫރިއްޔާ ޑރ. މުހަންމަދު މުއިއްޒު އިސްކަން ދެއްވާފައި ވަނީ އައްބާސް ޝަރީފުގެ ނަމަށެވެ.
