ޔޫތު މިނިސްޓްރީން ޖަމިއްޔާތަކަށް މި ގްރާންޓް ދޫކުރިކަން ހާމަކުރީ ރައީސް އޮފީހުގައި މިއަދު ބޭއްވި ނޫސްވެރިންްގެ ބައްދަލުވުމެއްގައި އެ އޮފީހުގެ ތަރުޖަމާނު ހީނާ ވަލީދެވެ.
ހީނާ ވިދާޅުވީ 16 ޖަމިއްޔާއަކަށް ތިން މިލިއަން ރުފިޔާ ދީފައިވާ ކަމަށެވެ. ނަމަވެސް ޖަމިއްޔާތައް ކަނޑައެޅި ގޮތެއް ވިދާޅެއް ނުވެ އެވެ. އެކަމަށް އެދި ހުށައެޅީ ކިހާ ޖަމިއްޔާއެއް ކަމެއް ވެސް ވިދާޅެެއް ނުވި އެވެ.
ޔޫތު މިނިސްޓަރުކަމާ އިބްރާހީމް ވަހީދު (އަސްވާޑު) ހަވާލުވެވަޑައިގަތުމަށް ފަހު އެންމެ ފުރަތަމަ ބޭއްވި ނޫސްވެރިންގެ ބައްދަލުވުމުގައި އޭނާ ވަނީ ޖަމިއްޔާތަކުން ސަރުކާރުގެ އެހީތެރިކަމަށް އެދޭ ކަން ފާހަގަ ކުރައްވައިފަ އެވެ. އަދި އެ ކަމަށް މިނިސްޓްރީން އުސޫލުތަކެއް ހަމަޖައްސަވާނެ ކަމަށް މިނިސްޓަރު އޭރު ވިދާޅުވި އެވެ.
މަދަނީ ޖަމްއިއްޔާތަކަށް އެހީ ދިނުމުގެ މައިގަނޑު މަގްސަދަކީ މުޖުތަމައު ބާރުވެރިކުރުމަށް މަދަނީ ޖަމްއިއްޔާތަކުން ކުރަމުންދާ މަސައްކަތްތައް ފާހަގަކޮށް އެފަދަ މަސައްކަތްތަކަށް އެއްބާރުލުންދީ އެހީތެރިކަން ފޯރުކޮށްދިނުމާއެކު ގައުމީ ތަރައްގީގައި މަދަނީ ޖަމްއިއްޔާތަކުގެ ދައުރު ފުޅާ ކުރުމެވެ.
