ސަރުކާރުން މިހެން ބުނެފައި މިވަނީ މިއަހަރު ސްޓޫޑަންޓް ލޯނު ހަމަޖެހުނު ދަރިވަރުންނަށް ލޯނު ފައިސާ ދޫކުރުން ވަރަށް ބޮޑަށް ލަސްވެ، ޝަކުވާ ބޮޑުވެފައި ވަނިކޮށެވެ.
މިއަހަރު ލޯނަށް ހުޅުވާލި 500 ފުރުސަތަށް އެދި 1709 ދަރިވަރަކު ކުރިމަތިލި އެވެ. ހަޔާ އެޑިއުކޭޝަން މިނިސްޓްރީން ނިންމާފައި އޮތީ މި ހުރިހާ ދަރިވަރުންނަށް ލޯނު ދޭށެވެ. އޭގެ ތެރޭގައި އަމިއްލަ ހަރަދުގައި ބޭރުގައި ކިޔަވަމުންދިޔަ ބައެއް ދަރިވަރުން ވެސް ލޯނަށް އެދި ކުރިމަތިލުމުން ޝަރުތު ހަމަވާ ކަމަށް ނިންމައި ލޯނު ދޭން އޮތީ ނިންމައިފަ އެވެ.
އެކަމަކު ރާއްޖެއިން ބޭރުގެ ގިނަ ޔުނިވާސިޓީތަކެއްގައި ސެޕްޓެމްބަރު/ އޮކްޓޫބަރު އިންޓޭކްގެ ކިޔެވުން ފެށެން ކުޑަތަންވެފައި އޮތްއިރު ވެސް އަދިވެސް ދަރިވަރުންނަށް ފައިސާ ނުލިބެ އެވެ.
ރައީސް އޮފީހުގައި މިއަދު އޮތް ނޫސްވެރީންގެ ބައްދަލްވުމެއްގައި އެކަމާ ގުޅޭގޮތުން ސުވާލު ކުރުމުން ރައީސް އޮފީހުގެ ތަރުޖަމާން ހީނާ ވަލީދު ވިދާޅުވީ ސަރުކާރުން އެންމެ އަހަންމިއްޔަތުކަން ދޭ އެއްކަމަކީ ދަރިވަރުންގެ ލޯނުގެ ކަންކަން ކަމަށެވެ. ހާއްސަކޮށް ދަރިވަރުންގެ ކިޔެވުމަށް ބުރޫނާރާނެ ގޮތަށް ފައިސާ ދެއްކޭނެ ގޮތް ހަމަޖެއްސުމަށް ވަރަށް ބޮޑު އަހަންމިއްޔަތެއް ދޭ ކަމަށެވެ.
އަލަށް ސްޓޫޑަންޓް ލޯނު ހަމަޖެހުނު ދަރިވަރުންނަށް ލޯނު ފައިސާ ދޫކުރުން ވަރަށް ބޮޑަށް ލަސްވެ އެކަމުގެ ޝަކުވާ ބޮޑުވެފައި ވާއިރު މިދިޔަ ސަރުކާރުގައި ލޯނު ލިބި ކިޔަވަމުންދާ ދަރިވަރުންނަށް ވެސް ގަވާއިދުން ލޯނު ފައިސާ ނުލިބޭ ކަމުގެ ޝަކުވާ ކުރިއެވެ.
