މި ހާދިސާ ހިނގާފައިވަނީ "ޖަހައިޒު" ގެ ގޮތުގައި ޓީވީއެސް އަޕާޗީ ބައިކެއް އަދި 3 ލައްކަ ރުފިޔާ ހޯދުމަށް ފިރިމީހާ ކުރި މަސައްކަތް ކާމިޔާބު ނުވުމުންނެވެ.
"ޖަހައިޒު" އަކީ އިންޑިއާގައި ކައިވެންޏަށްފަހު އަނބިމީހާ ފިރިމީހާއަށް ދައްކަންޖެހޭ ރަނެކެވެ.
މަރުވި އަންހެންމީހާ މީނާ އާއި އޭނާގެ ފިރިމީހާ ސުންދަރު ކައިވެނިކުރިތާ ދެ އަހަރު ވެފައިވާއިރު، މި މުއްދަތުގެ ތެރޭގައި ޖަހައިޒުގެ ނަމުގައި ސުންދަރު ވަނީ މީނާއަށް އަނިޔާކުރަމުން ގޮސްފައެވެ. މީނާ ވަނީ މިކަން އޭނާގެ ބައްޕައަށް ކިޔައިދީފައެވެ.
ދެ މަފިރިން ކައިވެނި ކުރީއްސުރެ ދިރިއުޅެމުން ދިޔައީ މީނާގެ މައިންބަފައިންގެ ގޭގައެވެ. ނަމަވެސް މި ހަފްތާގެ އާދީއްތަ ދުވަހުގެ ރޭ ސުންދަރު އައިސް މީނާ ގެންދިޔައެވެ. ގެއަށް ގެނައުމަށްފަހު ޖަހައިޒާ ގުޅޭގޮތުން ވާހަކަދެއްކުމަށްފަހު، ޖަހައިޒު ނުލިބުމުން ސުންދަރު ވަނީ މީނާއަށް ތަޅާ އަނިޔާކޮށް މަރާލާފައެވެ. އޭގެފަހުން ސުންދަރު ވަނީ ފިލައިގެން ގޮސްފައެވެ.
މި މައްސަލައިގައި މީނާގެ އާއިލާއިން ވަނީ ފުލުހުންގެ އެހީތެރިކަމަށް އެދިފައެވެ. މީނާގެ ބައްޕަ ވިޖޭ ކަދަކް ބަންޝީ ވަނީ ސުންދަރުގެ އިތުރުން އޭނާގެ މަންމަ، ދައްތަ އަދި އިތުރު ހަތަރު މީހުންނާ ދެކޮޅަށް މައްސަލަ ހުށަހަޅާފައެވެ. ފުލުހުން މިހާރު ވަނީ މި މައްސަލަ ތަހުގީގު ކުރަން ފަށާފައެވެ.
