މި ހާދިސާ ހިނގާފައިވަނީ މިދިޔަ މަހުގެ 6 ވަނަ ދުވަހުއެވެ. މި މައްސަލައިގައި ތުހުމަތުކުރެވޭ ފަރާތް ފުރަތަމަ ބަންދުކުރެވުނީ 30 ދުވަހުގެ މުއްދަތަށެވެ. އޭގެފަހުން އިތުރު 15 ދުވަހަށް އޭނާގެ ބަންދު އިތުރުކޮށްފައިވެއެވެ.
ކްރިމިނަލް ކޯޓުގައި އިއްޔެ ބޭއްވުނު އަޑުއެހުމެއްގައި ފުލުހުން ބުނެފައިވަނީ، މި މައްސަލައިގައި ދައުވާކުރުމަށް ޕްރޮސެކިއުޓާ ޖެނެރަލްގެ އޮފީހަށް ފޮނުވާފައިވާ ކަމަށާއި، ދައުވާކުރުމާމެދު ގޮތެއް ނިންމުމުން ޝަރީއަތް ނިމެންދެން ބަންދުގައި ބެހެއްޓުމާމެދު ގޮތެއް ނިންމުމަށް ހުށަހަޅާނެ ކަމަށެވެ.
ކޯޓު އަމުރުގައިވާ ގޮތުން، ތުހުމަތުކުރެވޭ ފަރާތް ސްކޫލަށް ވަދެ ބައެއް ޓީޗަރުންނަށް ބިރުދެއްކި ކަމަށް ސްކޫލުގެ މުވައްޒަފުން ހެކިބަސް ދީފައިވެއެވެ. ނަމަވެސް އެއްވެސް މީހެއްގެ ގައިގައި އަތްލާފައިނުވާކަމަށް ބުނެފައިވެއެވެ. މި އަމަލު ހިންގާފައިވަނީ ދަރިވަރުންގެ ކުރިމަތީގައެވެ.
އިތުރަށް ފާހަގަކޮށްފައިވަނީ، ތުހުމަތުކުރެވޭ ފަރާތަކީ ކުރިން ވެސް ބިރުދެއްކުމުގެ މައްސަލަތަކުގެ ކުށުގެ ރެކޯޑު އޮތް މީހެއްކަމަށެވެ. މިކަމަށް ރިޢާޔަތްކޮށް، އިތުރު 15 ދުވަހަށް އޭނާ ބަންދުގައި ބެހެއްޓުމަށް ކްރިމިނަލް ކޯޓުން އަމުރުކޮށްފައިވެއެވެ.
