މި މަސައްކަތް ކުރި ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އިން އެކްސްގައި ކުރި ޕޯސްޓެއްގައި ބުނެފައިވަނީ ތިނަދޫގެ މަގުތައް ޒަމާނީ ފެންވަރަށް ތަރައްގީ ކުރުމަށް އެ ކުންފުނިން ކުރިއަށް ގެންދިޔަ މަޝްރޫއުގެ މަސައްކަތްތައް މިހާރު ނިމިފައިވާ ކަމަށެވެ.
މި މަޝްރޫއުގެ ދަށުން 19 މަގެއްގައި ޖުމްލަ 7.8 ކިލޯ މީޓަރުގެ ސަރަހައްދެއް ތާރުއަޅައިގެން ތަރައްގީކޮށްފައިވެއެވެ. އާރްޑީސީއިން މި މަސައްކަތް ކޮށްފައިވަނީ ދެ ފޭސްއަކަށް ބަހާލައިގެންނެވެ.
އާރްޑީސީން އިތުރަށް ބުނެފައިވަނީ މި މަޝްރޫއު ކާމިޔާބުކަމާއެކު ކުރިޔަށް ގެންގޮސް ނިންމުމުގައި މަސައްކަތް ކުރި މުވައްޒަފުންނަށާއި ތިނަދޫ ސައިޓްގައި އިސްކޮށް މަސައްކަތް ކުރި މުވައްޒަފުންނަށް އާރްޑީސީގެ ނަމުގައި ހާއްސަ ޝުކުރު އަދާކުރާ ކަމަށެވެ.
ތިނަދޫ މަގު ހެދުމުގެ އަމަލީ މަސައްކަތްތައް ފެށިފައިވަނީ ނިމިދިޔަ ސަރުކާރުގައި 2022 ވަނަ އަހަރުއެވެ. މިއީ ގާތްގަނޑަކަށް ދެ އަހަރު ދުވަހުގެ މުއްދަތެއްގައި ނިންމާލެވިފައިވާ މަޝްރޫއެކެވެ.
