ހޯމަ ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން ހެރިޓޭޖް މިނިސްޓަރު އާދަމް ނަސީރު ވިދާޅުވީ ޒަމާނުއްސުރެއް ކަންކުރެވެމުން އާގޮތުން ދިވެހި ރާއްޖޭގެ ތަރިކައިގެ ދާއިރާ ވެފަ އޮންނަނީ ހަރަދުގެ ދާއިރާއަކަށް ކަމަށާއި ހަރަދުކުރަން ޖެހި، އެއިން ބަދަލެއް ނުލިބޭ ދާއިރާއަކަށް ކަމަށެވެ.
ރައީސް ޑރ.މުހައްމަދު މުހައްމަދު މުއިއްޒިގެ ސިޔާސަތުގެ ދަށުން ރައްޔިތުންގެ މަޖިލީހުގައި ދެއްކެވި ވާހަކަފުޅުގައި، ސަގާފަތާއި ތަރިކައިން އާމްދަނީ ލިބޭ ގޮތަށް ސިޔާސަތު ބަދަލުކުރައްވާނެކަމަށް އިއުލާނުކުރައްވާފައިވާކަން ފާހަގަކޮށް އާދަމް ނަސީރު ވިދާޅުވީ ހެރިޓޭޖް މިނިސްޓްރީގައި ރައީސް މުއިއްޒުގެ އިރުޝާދުގެ ދަށުން މިފަހަރުގެ ސްޓްރެތެޖިކް ޕްލޭންގައި އެކަންކަން އެކުލަވާލާފައި އޮންނާނެ ކަމަށެވެ.
އޭގެއިތުރުން ރާއްޖޭގެ ތަރިކައަކީ ދިރިއުޅުމުމުގެ ބަޔަކަށް ވުމުގެ އިތުރުން ގައުމީ އާމްދަނީގައިވެސް ތަރިކަ ހިމެނިގެން ދާނެކަމުގެ ޔަގީންކަން މިނިސްޓަރު ދެއްވި އެވެ.
ދާދިފަހުން ދައުލަތުގެ މީޑިއާ މެދުވެރިކުރައްވައި ރައްޔިތުންނާއި ވާހަކަ ދައްކަވަމުން މިނިސްޓަރު އާދަމް ނަސިރު ވަނީ ދާރުލްއާސާރުތައް ތަރައްގީކުރުމަށް ނިންމާފައިވަނީ އާމްދަނީ ލިބޭނެ ގޮތަކަށްކަމަށެވެ.
ރާއްޖޭގެ އެކި ސަރަހައްދުތަކުގައި ދާރުލްއާސާރުތައް ބިނާކުރުމަކީ އަމާޒެއްކަމަށް ފާހަގަކޮށް އާދަމް ނަސިރު ވިދާޅުވީ މި މަޝްރޫއުތައް ކުރިއަށް ގެންދިޔުމަށްޓަކައި އަންނަ އަހަރުގެ ބަޖެޓުގައި ހިމަނައި، އެކަމަށް މަސައްކަތް ކުރައްވާނެކަމަށެވެ. އަދި ރާއްޖޭގައި އޮތް ހަލޯރާތް ދެމެހެއްޓުމަށްޓަކައި މިފަދަ ދާރުލްއާސާރުތައް ތަރައްގީކުރުމަކީ މުހިއްމުކަމެއްކަމަށް ވެސް ވަޒީރު ފާހަގަކުރެއްވި އެވެ.
