މީ ދިވެހި ރައްޔިތެއްކަން އަންގައިދޭ އައިޑީކާޑު މާލެ ފިޔަވައި އެހެން ރަށެއްގައި ޕްރިންޓްކުރަން ފެށީ ފުރަތަމަ ފަހަރެވެ.
ވިލިނގިލީގައި މި ހިދުމަތް ފެށުމަށް ބޭއްވި ރަސްމިއްޔާތުގައި މި ހިދުމަތް ފައްޓަވާ ދެއްވީ ދާހިލީ ވަޒީރު އަލީ އިހްސާންއެވެ. މި ރަސްމިއްޔާތުގައި ވިލިގިނލީ ކައުންސިލްގެ މެމްބަރުން ވަނީ ބައިވެރިވެފައެވެ.
އައިޑީ ކާޑް ހަދަން ފެށި ފަހުން މިހާތަނަށް އެ ކާދޑު ޕްރިންޓްކުރަމުން އައި ހަމައެކަނީ މާލޭގައި ހުންނަ ޑިޕާޓްމެންޓް އޮފް ރެޖިސްޓްރޭޝަންގެ މައި އޮފީހުންނެވެ.
2022 ވަނަ އަހަރުން ފެށިގެން ރާއްޖޭގެ ކޮންމެ ތާކު ހުރެވެސް އައީޑީ ކާޑަށް ހުށައެޅޭނެ ގޮތް ވަނީ ޑީއެންއާރު ހަމަޖައްސާފައެވެ. އެކަމަށް އެދެންޖެހެނީ ޑީއެންއާރުގެ ހާއްސަ ޕޯޓަލް "ނާރެސް" މެދުވެރިކޮށެވެ.
"ނާރެސް" މެދުވެރިކޮށް ކައުންސިލްތަކަށް އައިޑީކާޑްގެ ސްޓޭޓަސް ބެލުމާއި މާލެއެކޭ އެއްފަދައިން އައިޑީ ކާޑް ދޫކުރުން އަދި އެޕްލިކޭޝަންތައް ބަލައިގަތުމަށް ހިދުމަތް ލިބިގެންދާނެއެވެ. ހަމަ އެއާއެކު ކޮންމެ ކައުންސިލަކަށް 10 އިނގިލީގެ ނިޝާން ނަގާ ފިންގާ ޕްރިންޓް ޑިވައިސްތަކެއްވެސް ހަވާލުކުރެވޭނެކަމަށް ޑީއެންއާރުން ބުނެއެވެ.
އުމުރުން 65 އަހަރުން މަތީގެ މީހުންގެ އައިޑީކާޑު މުއްދަތު ހަމަނުވާނެ ގޮތަށް ބަދަލުކޮށް ދާއިމީ އައިޑީކާޑެއް ދިނުމަށް ޑިޕާޓްމެންޓް އޮފް ނެޝަނަލް ރެޖިސްޓްރޭޝަނުން ވަނީ ނިންމާފައެވެ.
