ބަންކަރިނަށް ބޯޓްތަކަށް ފެން ފޯރުކޮށްދޭން ބޭނުންކުރާ ފެން ބާޖު އޮންނާނީ ރާއްޖޭގެ އުތުރު ތުރާކުނުގައިކަމަށް މޯލްޑިވްސް ޕޯޓްސް ލިމިޓެޑުން ބުނެފިއެވެ.
Advertisement
މިކަމުގެ އެއްބަސްވުމުގައި މޯލްޑިވްސް ޕޯޓްސް ލިމިޓެޑާއި ތުރާކުނު ކައުންސިލާ ދެމެދު މިއަދު ވަނީ ސޮއިކޮށްފައެވެ.
މި އެއްބަސްވުމުގައި އެމްޕީއެލްގެ ފަރާތުން ސޮއިކުރެއްވީ އެ ކުންފުނީގެ ސީއީއޯ މުހައްމަދު ވަޖީހް އިބްރާހިމެވެ. ތުރާކުނު ކައުންސިލްގެ ފަރާތުން ސޮއިކުރެއްވީ އެރަށު ކައުންސިލްގެ ރައީސް އަލީ އަބްދުއްލަތީފެވެ.
މިއެއްބަސްވުމުގެ ދަށުން އުތުރުގައި ވޯޓާ ބަންކަރިން ހިދުމަތް ދިނުމަށް އެމްޕީއެލްއިން ބޭނުންކުރާ ފެން ބާޖު އޮންނާނީ ތުރާކުނުގައެވެ. އަދި މި ފެން ބާޖަށް ބޭނުންވާ ފެން ބަރުކުރުމުގެ މަސައްކަތްވެސް ކުރާނީ ތުރާކުނުގައެވެ.
އެމްޕީއެލްގެ ސީއީއޯ ވަޖީހް ވިދާޅުވީ އުތުރުގައި ބަންކަރިންގެ ހިދުމަތް ފަށާއިރުި މިހާރުވެސް ބޯޓަކުން ފެން ބަރުކުރުމަށް އެދިފައިވާކަމަށެވެ.
" މިހާރުވެސް ގްރީކްގެ ބޯޓު އޮޕަރޭޓްކުރާ ފަރާތަކުން އެބަ އޮތް ފެން ހޯދަން އެދިފައި. ލަސްތަކެއްނުވެ އެގޮތަށް އެ މަސައްކަތް ފަށާނެ. މި ދާއިރާގެ ތަޖުރިބާކާރުންވެސް ވިދާޅުވަނީ މިއީ ވަރަށް ބޮޑު މާކެޓެއް ހުޅުވިގެންދާނެ ކަމެއް ކަމަށް. އެގޮތަށް ލަފާކުރެވެނީވެސް،" އެމްޕީއެލްގެ ސީއީއޯ ވަޖީހް ވިދާޅުވިއެވެ.
ބަންކަރިންނަށް އަންނަ ބޯޓުތައްކަށް ތެޔޮ ފޯރުކޮށް ދިނުމުގެ ހިދުމަތް ފިޔަވައި ދެން ދޭން ޖެހޭ ހުރިހާ ހިދުމަތެއްވެސް ފޯރުކޮށްދޭނީ އެމްޕީއެލްއިންނެވެ. އެގޮތުން ބޯޓުތަކަށް ކެއުމާއި، ބުއިން، އަދި މެއިންޓަނަންސް ގެ ހިދުމަތް ހިމެނޭ ހެން 14 ހިދުމަތެއް ދޭން އެމްޕީއެލް ވަނީ ތައްޔާރުވެފައެވެ.
