އިމިގްރޭޝަނުން މި މީހުން ހޯދާފައިވަނީ ގަވައިދާ ހިލާފަށް އުޅޭ ބިދޭސީން ހޯދުމަށް އެ އިދާރާއިން ހިންގަމުން އަންނަ އޮޕަރޭޝަންތަކުގެ ތެރެއިންނެވެ.
މީ މީހުން ފެނުނީ ހ. ކަޅުހުރާގެ ބަލާފާސްކުރުމުގެ ތެރެއިން އެގޭގެ ހުރި ކުޑަކުޑަ ގޮޅިއެއް ވަރުގެ ތަނެއްގައި ދިރިއުޅެމުން ދަނިކޮށެވެ. އެމީހުން ދިރިއުޅެމުން ދިޔަ ތަނުގައި ކައްކާ ކައިބޮ ހަދަން ބޭނުންކުރާ ބަދިގޭގެ އުނދުން ތއް ހުރީ ފާހާނާ ދޮރުމަތީގައެވެ. ނިދަނީ އެތަންކޮޅުގައި ފިލައިން ޑެކެއް އަޅާ އެތަނުގެ މަތީގައެވެ. އިމިގްރޭޝަނުން އާއްމުކޮށްފއިވާ ވީޑިއޯއަށް ބެލުމުން އެތަނުގެ މުޑަދާރިކަމާއި ސާފުތާހިރުކަން ކުޑަކަން ފެނެއެވެ.
އިމިގްރޭޝަން މުވައްޒަފުން ވަންއިރުވެސް ފާހާނަކުރުމަތީގައި ބަހައްޓާފައި ހުރި އުނދުނުގައި ބީދޭސީން ދިޔައީ ކޮންމެވެސް އެއްޗެއް ކައްކަމުންނެވެ. މި ތަންކޮޅުގެ ތެރެއިން 9 ބިދޭސީއަކު ވަނީ އަތުލައިގެންފައެވެ. އެގެތެރޭގައި ވަޒީފާ ދިނުމަށް ރާއްޖެ ގެނައި ވެރިފަރާތައް ފިލައިގެން އުޅޭ 6 މީހަކުވެސް ހިމެނޭކަމަށް އިމިގްރޭޝަނުން ވަނީ ބުނެފައެވެ.
ރާއްޖޭގައި ގަވައިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމަށް ކުރާ މަސައްކަތުގެ ދަށުން މިދިޔަ ބުރާސްފަތި ދުވަހުވެސް ވަނީ 30 ބީދޭސީއަކު ޑީޕޯޓްކޮށްލައިފައެވެ. މި ސަރުކާރު ވެރިކަމާއި ހަވާލުވުމަށްފަހު މިދިޔަ މަހުގެ 25ގެ ނިޔަލަށް 3322 ބިދޭސީން ވަނީ ރާއްޖޭ ނާދެވޭ ގޮތަށް ފޮނުވާލާފައެވެ.
