އެމަނިކުފާނު މިހެން ވިދާޅުވީ، އދ. ގެ މެންބަރު ގައުމަކަށް ރާއްޖެވިތާ 59 އަހަރު ފުރުމުގެ މުނާސަބަތުގައި އދ ގެ މައި މަރުކަޒުގެ ކައިރީގައި ހުންނަވާ ދެއްވި ހާއްސަ ވީޑިއޯ މެސެޖެއްގަ އެވެ.
ރައީސް ވިދާޅުވީ މިއަދަކީ ދިވެހިރާއްޖެ ދުނިޔޭގެ އެންމެ ބިޔަ އެންމެ ވަރުގަދަ ގައުމުތަކާ އެއް ސަފެއްގައި އެއް ހަމައެއްގައި ކުރިއަށް ދިއުމަށް މަގުފަހިވި ދުވަސް ކަމަށެވެ.
އެމަނިކުފާނު ވަނީ އދ. ގައި ރާއްޖެ ކުރާ ދަތުރަކީ ކާމިޔާބު ދަތުރެއްކަން ފާހަގަކުރައްވާފަ އެވެ. އެގޮތުން ފުދުންތެރިކަމަށް ބިންގާ އެޅިގެން ދިޔައީ އދ. އާއެކު ކަމަށް އެމަނިކުފާނު ވިދާޅުވި އެވެ. އަދި ފާއިތުވި ދުވަސްތަކުގައި ރާއްޖޭގެ މަންދޫބުން އދ. ގައި ރާއްޖޭގެ މަސްލަހަތު ހިމާޔަތްކޮށް ކުރިއަރުވަން މަސައްކަތް ކުރައްވާފައިވާކަމަށް އެމަނިކުފާނު ވިދާޅުވި އެވެ.
އދ. ގައި ރާއްޖޭގެ ބަސް ވިކެން ޖެހެނީ އެތަނަކީ ސުލްހަ ހޯދުމަށް މަސައްކަތް ކުރާ މައިދާންކަމަށްވާތީކަމަށް ރައީސުލްޖުމްހޫރިއްޔާގެ މެސެޖުގައި ފާހަގަކުރެއްވި އެވެ. އަދި އެތަނުގެ ބަހުސްތަކުގައި ބައިވެރިވެ ބަސްބުނަންޖެހޭއިރު، ތަރައްގީއަށް މަގުކޮށޭނީ މުޅި ދުނިޔޭގެވެސް އިހުތިރާމް ލިބިގެންކަމަށް އެމަނިކުފާނު ވިދާޅުވި އެވެ.
ރައީސް ވިދާޅުވި ގޮތުގައި އދ. ގައި ދިވެހިން ކުރަމުން އަންނަނީ ފަހުރުވެރިވާނެ ފަދަ ކާމިޔާބު ދަތުރެކެވެ. އެކަހެރިވެފައި އޮތުމުގެ ބަދަލުގައި ދުނިޔޭގެ ސިޔާސީ ސަފުތަކާ ގުޅި، އެކުވެރި ކަމުގައި ކުރާ މި ދަތުރަކީ ނިކަމެތިކަމުން، ފުއްދުންތެރިކަމަށް ބިންގާ ވެސް އެޅިފައިވާ ދަތުރެއް ކަމަށް ރައީސް ވިދާޅުވި އެވެ. މޫސުމަށް އަންނަ ނޭދެވޭ ބަދަލުތަކުގެ ސަބަބުން ކުރާ އަސަރު ދުނިޔެ އަށް ކިޔައިދީ، އެކަން ސަމާލުކަން ގެނައުމަށް މި ދަތުރުގައި ރާއްޖެ އިން މަސައްކަތް ކޮށްފައިވާ ކަމަށް އެ މަނިކުފާނު ވިދާޅުވި އެވެ.
ރައީސް ދެއްވި މެސެޖުގައި ވަނީ އެމަނިކުފާނުގެ ހާރިޖީ ސިޔާސަތުގައި އަބަދުވެސް އެންމެ އިސްކަމެއް ދެއްވާނީ ދިވެހިންގެ މަސްލަހަތު ހިމާޔަތް ކުރުމަށް ކަމަށް ވިދާޅުވެފަ އެވެ. އަދި "ޕްރޯ މޯލްޑިވްސް" ސިޔާސަތު ކުރިއަށް ގެންދަވާނެ ކަމަށް ވިދާޅުވި އެވެ. ހަމައެހެންމެ ދިވެހި ރައްޔިތުންގެ ކުރިއެރުމަށް އަބަދުވެސް މަސައްކަތްކޮށްދެއްވާނެކަމުގެ ޔަގީންކަން ރައީސް ވަނީ ދެއްވާފަ އެވެ.
ދިވެހިރާއްޖެއަށް އދ ގެ މެންބަރުކަން ލިބިފައިވަނީ 1965 ވަނަ އަހަރުގެ ސެޕްޓެމްބަރު މަހުގެ 21 ވަނަ ދުވަހު އެވެ.
ރާއްޖޭގެ މަތީ ފަންތީގެ ވަފުދަކާއެކު ރައީސް އެމެރިކާގެ ނިއުޔޯކަށް ވަޑައިގަތީ އދ.ގެ އާންމު މަޖިލީހުގެ 79 ވަނަ ބައްދަލުވުމުގައި ބައިވެރިވެވަޑައިގަތުމަށެވެ. 79 ވަނަ ބައްދަލުވުމުގައި ރައީސް ޑރ. މުހައްމަދު މުއިއްޒު ތަގުރީރުކުރެއްވުމަށް ހަމަޖެހިފައިވަނީ މިމަހުގެ 24 ވާ އަންގާރަ ދުވަހުގަ އެވެ.
މިއީ ރާއްޖޭގެ ރައީސަކު އދ.ގެ ސެކިއުރިޓީ ކައުންސިލްގައި ތަގުރީރުކުރައްވާ ފުރަތަމަ ފަހަރުކަން ފާހަގަކޮށްލެވެ އެވެ. އެމަނިކުފާނުގެ މިދަތުރުފުޅު ދިމާވަނީ ދިވެހިރާއްޖެ އދ.ގެ މެންބަރު ގައުމަކަށް ވީތާ 59 އަހަރު ފުރޭ މުނާސަބަތާވެސް މެއެވެ.
- އިތުރަށް ކިޔާލަން: ކުދި ޖަޒީރާ ގައުމުތަކުގެ ދަރަނި ދެއްކުމަށް ހައްލުތަކެއް ބޭނުންވޭ: ރައީސް
