މި ބައްދަލުވުމުގައި ވަޒީރު ޢަލީ އިހްސާނާއި، އެ ވުޒާރާގެ ސްޓޭޓް މިނިސްޓަރު ޑރ. މުޙައްމަދު ކިނާނަތުގެ އިތުރުން ވަރލްޑް ބޭންކްގެ ފަރާތުން ރާއްޖެ ވަޑައިގެން އުޅުއްވާ އިސް ބޭފުޅުން ބައިވެރިވެވަޑައިގަތެވެ.
ބައްދަލުވުމުގައި މަޝްވަރާކުރެވުނު މައިގަނޑު ބައިތަކުގެ ތެރޭގައި:
- ޑިޖިޓަލް މޯލްޑިވްސް ފޯ އެޑަޕްޓޭޝަން، ޑީސެންޓްރަލައިޒޭޝަން އެންޑް ޑިވަރސިފިކޭޝަން (ޑީމެޑް) ޕްރޮޖެކްޓް ރީ-ސްޓްރަކްޗަރކޮށްގެން ކުރިއަށްގެންދާނެ ގޮތް
- ޑޭޓާ ޕްރައިވަސީ އެންޑް ޑޭޓާ ޕްރޮޓެކްޝަންގެ ބިލު
- ސައިބަރ ސެކިއުރިޓީ ބިލު
- ޑޭޓާ ޝެއަރިންގގެ މުހިންމުކަން
ސްޓޭޓް މިނިސްޓަރ ޑރ. މުހައްމަދު ކިނާނަތު ވިދާޅުވިގޮތުގައި، ކުރިއަށް އޮތީ ސްޓޭކްހޯލްޑަރުންނާއެކު ބިލުތައް މަޝްވަރާކުރުމުގެ މަސައްކަތްތަކެވެ. މި މަސައްކަތްތައް ވެސް ވަރލްޑް ބޭންކުގެ ހިލޭ އެހީގެ ދަށުން ކުރިއަށް ގެންދެވޭނެއެވެ.
ޑިޖިޓަލް މޯލްޑިވްސް ފޯ އެޑަޕްޓޭޝަން، ޑީސެންޓްރަލައިޒޭޝަން އެންޑް ޑިވަރސިފިކޭޝަން (ޑީމެޑް) މަޝްރޫޢުއަކީ ވޯލްޑް ބޭންކްގެ 10 މިލިޔަން ޑޮލަރުގެ ހިލޭ އެހީގެ ދަށުން ހިންގާ ޕްރޮޖެކްޓެކެވެ. މި މަޝްރޫޢުގެ މައިގަނޑު މަގްސަދުތަކުގެ ތެރޭގައި:
- އިޖްތިމާއި އަދި އިގްތިސޯދީގޮތުން އިތުރު ފުރުސަތުތައް ފަހިކުރުން
- އިންޓަރނެޓް ފަދަ މުއާސަލާތީ ވަސީލަތްތައް ރެގިއުލޭޓްކުރުމަށް ބޭނުންވާ ޤާނޫނީ އޮނިގަނޑާއި ޓެކްނިކަލް ސެޓްއަޕް ގާއިމްކުރުން
- ދައުލަތުގެ މުވައްސަސާތަކުގެ ޓެކްނިކަލް ކެޕޭސިޓީ އިތުރުކުރުން
- ޑިޖިޓަލް އައިޑީގެ ނިޒާމް ގާއިމްކުރުން
- މޫސުމީ އަދި ތިމާވެށްޓަށް އަންނަ ބަދަލުތަކުގެ ޑޭޓާ ނަގާ، ރައްކާކުރެވޭ ނިޒާމެއް ގާއިމްކުރުން
މި މަޝްރޫއުގެ އެއްބަސްވުމުގައި ސޮއިކޮށްފައިވަނީ 2022 ވަނަ އަހަރުގެ ޖުލައި މަހުގެ 4 ވަނަ ދުވަހުއެވެ.
