އދގެ އާންމު މަޖިލީހުގެ ބައްދަލުވުމުގެ ހަވާސާގައި ކުރިއަށްދިޔަ ގްލޯބަލް ސަމިޓް ފޯ ޗޭންޖްގައި މިރޭ ދެއްވި ތަގުރީރެއްގައި ރައީސް ވިދާޅުވީ ދުނިޔެއަށް ބޭނުންވަނީ ހިޔާލީ ވާހަކަތަކެއް ދައްކާ ނިޒާމެއް ނޫންކަމަށާއި، ދުނިޔެއަށް މިއަދު ބޭނުންވަނީ ކުރިމަތިވެފައިވާ މައްސަލަތަކަށް ހައްލުތައް ހޯދައިދޭން އަމަލީގޮތުން މަސައްކަތްކުރާނެ ނިޒާމެއްކަމަށެވެ.
އެމަނިކުފާާނު ވަނީ މިކަމުގައި ރާއްޖޭގެ ތަސައްވުރު ހާމަކުރައްވައި ތިން ކަމެއް ހުށަހަޅުއްވައިފަ އެވެ.
ރައީސް ވިދާޅުވީ މިއީ މި ނިޒާމުގެ ތެރެއިން ނަތީޖާ ނެރެންވީ ވަގުތު ކަމަށާއި އެންމެ ފުރަތަމަ ކުރަން ޖެހޭ ކަމަކީ އަދުގެ ޒުވާން ޖީލު ބާރުވެރިކުރުވުން ކަމަށެވެ.
މާދަމާ ދުނިޔެ ލީޑުކުރަން ތިބި ބަޔަކީ އަދުގެ ޒުވާނުން ކަމަށާއި ރާއްޖޭގެ ތަސައްވުރަކީ ޑިޖިޓަލް އިނޮވޭޝަންގެ ތެރެއިން ޒުވާނުންނަށް އިގްތިސޯދީ ފުރުސަތުތަކާއި އިޖުތިމާއީ ހަމަހަމަކަން ގާއިމްކޮށްދިނުން ކަމަށް ރައީސް ވިދާޅުވި އެވެ.
ދެވަނަ ހުށަހެޅުމެއްގެ ގޮތުގައި އެމަނިކުފާނު ހުށަހަޅުއްވާފައި ވަނީ، މޫސުމީ ބަދަލުތަކުން އަރައިގަތުމަށް މަސައްކަތްކުރުމެވެ. އެގޮތުން، މޫސުމަށް އަންނަ ބަދަލުތަކަކީ މުސްތަގުބަލަށް ދިމާވެފައިވާ އެންމެ ބޮޑު ނުރައްކާކަން ފާހަގަކުރައްވައި ރައީސް ވިދާޅުވީ، މޫސުމީ ބަދަލުތަކުގެ ސަބަބުން ދުނިޔޭގައި ގާތްގަނޑަކަށް 62 ޕަސަންޓު ޒުވާނުންނަށް އަސަރުކުރާކަމަށެވެ.
މޫސުމީ ކާރިސާތަކުގެ ސަބަބުން ކުދި އަދި ތަރައްގީވަމުން އަންނަ ގައުމުތައް (ސިޑްސް)އަށް ވެސް ވޭތުވެދިޔަ 15އަހަރުގެ ތެރޭގައި 153 ބިލިއަން ޑޮލަރުގެ ގެއްލުން ލިބިފައިވާކަން އެމަނިކުފާނު ފާހަގަކުރެއްވިއެވެ. ރައީސް ވަނީ ރާއްޖެއިން ނެޓް ޒީރޯ ގައުމަކަށް ވުމަށް ވުމަށް އަމާޒު ހިފާފައިވާކަން ވެސް ފާހަގަކުރައްވައިފަ އެވެ.
އދގެ އާންމު މަޖިލީހުގެ ބައްދަލުވުމުގެ ހަވާސާގައި ކުރިއަށްދިޔަ ގްލޯބަލް ސަމިޓް ފޯ ޗޭންޖް
ތިންވަނަކަމެއްގެ ގޮތުގައި ރައީސް ފާހަގަކުރެއްވީ ފައިނޭންސްކުރުމެވެ. ފައިނޭންސްގެ ގޮތުގައި ތަރައްގީވަމުން އަންނަ ގައުމުތަކަށް ލިބޭ ފައިސާއާ އަދާކުރަންޖެހޭ ފައިސާގެ ފަރަގު ބޮޑުވެފައިވާކަން ރައީސް ފާހަގަކުރެއްވި އެވެ. އަދި އެކަމުގެ ވޭން އެންމެ ރަނގަޅަަށް އިހުސާސްކުރާ އެއް ގައުމަކީ ރާއްޖެކަމަށް ވިދާޅުވި އެވެ.
އަދި މުސްތަގުބަލުގެ ޖީލުތަކުން މިހާރުގެ ޖީލުތައް މިނެކިރާނީ ފަށާ މަސައްކަތަކުން ނޫން ކަމަށާއި، ނިންމައި ނެރޭ ނަތީޖާއަކުން ކަމަށްވެސް ރައީސް ވިދާޅުވި އެވެ. އަދި މުސްތަގުބަލުގެ ޖީލުތަކުން އިލްތިމާސްކުރަނީ ހިިތްވަރަށް ކަމަށާއި، އެއީ ޣައްޒާގައި ހިނގާ ޤަތުލު އާންމު ހުއްޓުވުމުގެ ހިތްވަރާއި، އދގެ ފުރިހަމަ މެންބަރުކަން ފަލަސްތީނުގެ ދައުލަތަށް ދިނުމުގެ ހިތްވަރާއި، އިންސާނީ ހައްގުތަކަށް އަރައިގަންނަ މީހުން ޖަވާބުދާރީކުރުވުމުގެ ހިތްވަރަށް ކަމުގައި ރައީސް ވިދާޅުވި އެވެ.
ދެ ދުވަހުގެ މުއްދަތަށް ކުރިއަށްދާ މި ސަމިޓްގެ މަގްސަދަކީ ބައިނަލްއަގްވާމީ ގޮތުން ވެފައިހުރި އެއްބަސްވުންތަކަށް ޢަމަލުކުރުން އަވަސްކުރުމާއި، އަދި "ޕެކްޓް ފޮރ ދަ ފިއުޗާ" މެދުވެރިކޮށް، އަލަށް ކުރިމަތިވަމުން އަންނަ ގޮންޖެހުންތަކުން އަރައިގަތުމަށް މަސައްކަތްކުރުމެވެ.
