ރައީސް މިހެން ވިދާޅުވީ މުނާސަބަތުގައި އެކްސްގައި ކުރެއްވި ޕޯސްޓެއްގައެވެ.
އަރަބި ބަހުން ކުރެއްވި މި ޕޯސްޓްގައި ރައީސް ވަނީ ދެ ހަރަމްގެ ބެލެނިވެރިފަރާތްކަމަށްވާ ސަލްމާން ބިން އަބްދުލްއަޒީޒް އަލް ސައުދަށާއި ވަލީއަހުދު އަދި ބޮޑުވަޒީރު މުހައްމަދު ބިން ސަލްމާން ބިން އަބްދުލްއަޒީޒް އަލް ސައުދަށް ތަހުނިޔާ ފޮނުވާފައެވެ.
ރައީސް ވިދާޅުވީ ރާއްޖެއަކީ އިސްލާމީ ގޮތުން ބަދަހި ގުޅުމާއި، އެކުވެރިކަމާއި، ސައުދީ އަރަބިއްޔާއާ އެކު އޮންނަ ގާތް ގުޅުމުގެ މައްޗަށް ބިނާވެގެންވާ ޤައުމެއްކަމަށެވެ. އަދި ދެ ގައުމުގެ ބަދަހި ގުޅުމުގެ ސަބަބުން ދެ ގައުމުގެ ރައްޔިތުންނަށް ވެސް ކުރިއެރުމާއި ތަނަވަސްކަން ލިބިގެންދާނެކަން ޔަގީންކުރައްވާކަމަށްވެސް ރައީސްގެ މެސެޖުގައިވެއެވެ.
ސައުދީގެ ގައުމީ ދުވަހުގެ ގޮތުގައި ފާހަގަކުރަނީ ކޮންމެ އަހަރެއްގެ ސެޕްޓެމްބަރު މަހުގެ 23 ވަނަ ދުވަހުއެވެ. އެދުވަސް ފާހަގަކުރަނީ އެ ޤައުމުގެ ބާނީ އަދި ކުރީގެ ރަސްގެފާނު އަބްދުލް އަޒީޒް ބިން އަބްދުއްރަހްމާން އަލް ސައުދު، ހަނގުރާމައަކަށްފަހު އެ ގައުމު އެއްބައިކުރު ދުވަހުގެ ގޮތުގައެވެ. މީ އެ ދުވަސް ފާހަގަކުރާތާ 94 އަހަރު ފުރޭ ދުވަހެވެ.
