މި ބްލަޑް ބޭންކް ރަސްމީކޮށް ހުޅުއްވައިދެއްވީ މިނިސްޓަރު ޑޮކްޓަރ އަބުދުﷲ ހަލީލް ކަމަށް ހެލްތް މިނިސްޓްރީން ބުނެއެވެ.
މި ބްލަޑް ބޭންކުން ލިބެންހުރި ހިދުމަތްތަކުގެ ތެރޭގައި ކްރޮސްމެޗް ހެދުން، އެންޓިބޮޑީ ސްކްރީނިން، ޑޯނާ ރެކްރޫޓްމަންޓް، ތެލެސީމިއާ ސްކްރީނިން، ޓީތީއައި ސްކރީނިން ފަދަ ހިދުމަތްތައް ލިބިގެންދާނެ ކަމަށް ހެލްތް މިނިސްޓްރީން މައުލޫމާތުދެއެވެ.
މިއީ މާލެ ފިޔަވައި ރާއްޖޭގެ އެހެން ރަށެއްގައި މިފަދަ ހިދުމަތް ލިބޭގޮތަށް ހުޅުވި ފުރަތަމަ ބްލަޑް ބޭންކްކަމަށްވާއިރު އެ ބްލަޑް ބޭންކައަކީ ރައީސް ޑރ. މުއިއްޒުގެ ވައުދާއި އެއްގޮތަށް ރީޖަނަލް ހޮސްޕިޓަލްތަކުގައި ބްލަޑް ބޭންކް ގާއިމްކުރެއްވުމަށް ކުރައްވަމުން ގެންދާވާ މަސައްކަތުގެ ދަށުން ހުޅުވި ބްލަޑް ބޭންކެއް ކަން ހެލްތް މިނިސްޓްރީން ފާހަގަކުރެއެވެ.
ގދ ގެ ސިއްހީ ހިދުމަތަށް 55 އަހަރު ފާހަގަކުރުމަށް ބޭއްވި ހާއްސަ ރަސްމިއްޔާތު ޝަރަފުވެރިކޮށްދެއްވުމަށް ތިނަދޫއަށް ކުރެއްވި ދަތުރުފުޅުގައި މިނިސްޓާ ހަލީލް ވަނީ އެ ހޮސްޕިޓަލުގެ ބްލަޑް ބޭންކްގެ އިތުރުން ރިޕްރަޑަކްޓިވް ހެލްތު ސެންޓާ ( އުފަންވެނި ކްލިނިކް ) އެއް ވެސް ހުޅުވާފައެވެ.
ހެލްްތް މިނިސްޓަރު ޑރ. އަބްދުﷲ ހަލީލު ވަނީ އައްޑޫއާއި ކުޅުދުއްފުށީގައި ހުރިހާ ވަސީލަތްތައް ހިމެނޭހެން ޒަމާނީ ފެންވަރުގެ ބްލަޑްބޭންކްއެއް މިއަހަރު ތެރޭ ގާއިމްކުރައްވާނެކަމަށް މިދިޔަ މޭ މަހު ބޭއްވި ނޫސްވެރިންގެ ބައްދަލުވުމެއްގައި ވިދާޅުވެފައެވެ.
އަލަށް ގާއިމްކުރި ތިނަދޫ ބްލަޑް ބޭންކުގެ އިތުރުން ރާއްޖޭގައި ބްލަޑް ބޭންކް ހުންނަ 5 ސަރަހައްދަކީ ކުޅުދުއްފުށީ، މާލެ އަދި އައްޑޫގައެވެ. އެގޮތުން މާލޭގެ ބްލަޑް ބޭންކް ހުންނަނީ އައިޖީއެމްއެޗް، އޭޑިކޭ އަދި ޓްރީ ޓޮޕްގައެވެ.
